Aqtóbelikter «Nıva» kóligin súırep, ziltemir kóterdi
AQTÓBE. QazAqparat - Aqtóbede Temir aýdanynyń kúnderi ótti. Kúsh synasqan aqtóbelikter salmaǵy 1 tonnadan asatyn «Nıva» kóligin súırep, ziltemir kóterdi, dep habarlaıdy QazAqparat tilshisi.
Aqtóbede Temir aýdanynyń kúnderi ótip, aýyl sharýashylyǵy jármeńkesi, qolóner sheberleriniń kórmesi, merekelik kontsert pen sporttyq jarys uıymdastyryldy. Kúsh synaǵyna Aqtóbe qalasy men birneshe aýdan ortalyǵynan 11 adam qatysty. Olar aldymen salmaǵy 40 keli bolatyn kanıstra kóterdi. Kanıstranyń ishine qum toltyryldy. Al ekinshi týrda salmaǵy 60 keli bolatyn qapty kóterip, qashyqtyqqa júgirdi. Úshinshi saıysta qatysýshylardyń barlyǵy «Nıva» kóligin súıredi.
«Temir aýdanynyń Shubarqudyq kentinen jarysqa arnaıy keldim. Ózim aýdandyq ІІB-de jumys isteımin, buryn kúrespen aınalysyp, respýblıkalyq, Azııa oıyndarynda júldeger atandym. Qazaqsha kúres, sambodan halyqaralyq dárejedegi sport sheberi bolǵan soń aýdannyń namysyn qorǵadym. Jarysqa qatysýshylardyń ishinde men eń úlkenimin. Jasym 37-de. «Nıva» kóligin birinshi ret súıredim. Synaqtar jeńil emes, qatysýshylardyń arasynda jastar da myqty»,- dedi Meırambek Bazylbekov. Jarysqa qatysýshy úshin 60 kelilik qapshyqpen júgirý, 120 keli ziltemirdi kóterý qıynǵa tústi. Biraq «Nıvany» 16 sekýndta súırep shyqty. Bul eń úzdik kórsetkish boldy.
Aıta keteıik, jarys qorytyndysy boıynsha 3-oryndy Temir aýdanynan Nurlybek Ahmetov, 2-oryndy Meırambek Samrat, al birinshi oryndy Meırambek Bazylbekov jeńip aldy. Qara kúsh ıelerine arnaıy medal, kýbok jáne aqshalaı syılyq berildi.
