Aqtóbelikter mal urlaǵandardyń aty-jóni men fotosyn ilip qoıýdy talap etti
AQTÓBE. QazAqparat - Mal urlyǵynan mezi bolǵan aqtóbelikter olardyń aty-jóni men fotosyn polıtsııa bólimshesine ilý jóninde usynys tastady. Endi ár aýyl men aýdandaǵy polıtsııa bólimshesinde tórt túlikti urlap, ony satyp jiberetinderdiń buryshy jasalatyn bolady, dep habarlaıdy «QazAqparat» tilshisi.
Qysy-jazy malyn baǵyp, jem-shóbin daıyndap otyrǵan aqtóbelikter urlyqtan sharshaǵan. Endi olar tórt túlikke aýyz salǵandardyń aty-jóni men túr-tulǵasyn bilip júrýdi qalaıdy.
«Aqtóbe qalasyndaǵy avtobýstarda qaltaǵa túsip, telefon men aqsha urlaıtyndardyń fotosy ilýli tur. Tipti, oblystyq ishki ister departamentiniń telefony men mekenjaıy jazylǵan. Sol ádisti mal urlyǵymen ustalǵandarǵa da paıdalaný qajet. Biz urlyqshynyń aýyldan, qaladan, basqa óńirden kelip júrgenin bilgimiz keledi. Tipti, kórshimiz shyǵar. Ýchaskelik ınspektorǵa aıtyp edik, «quqyǵymyz joq, bolmaıdy» dep shyǵaryp saldy»,- dedi Aqtóbe qalasy, Sazdy aýylynyń turǵyny Ábýbákir Muńaıtpasov.
Aýyl turǵynynyń bul usynysy oblys ákimi Berdibek Saparbaevtyń kóńilinen shyqty. Budan bylaı ár ýchaskelik ınspektordyń bólimshesinde mal urlyǵymen ustalyp, jazalanǵandardyń aty-jóni men fotosy ilýli turatyn boldy.
«Іlý qajet. Halyq durys aıtady. Bul qıyn jumys emes, oryndańyzdar»,- dedi Berdibek Saparbaev.
Aýyl turǵyndarynyń aıtýynsha, eger urlyqshynyń tegi belgili bolsa, saqtyq sharalary kúsheıedi. Olar «osy arqyly mal urlyǵy deregi azaıady» dep otyr.
Altynaı Saǵyndyqova
