Aqtóbelikter Qytaıdan keletin 2 myń týrısti áli kútip otyr
AQTÓBE. QazAqparat - EKSPO kórmesi aıasynda Aqtóbe qalasyna 2 myń týrıst kelýi múmkin ekeni aıtylǵan bolatyn. Aqtóbelikter qytaılyqtardy áli kútip júr, dep habarlaıdy QazAqparat tilshisi.
«EKSPO-2017» halyqaralyq kórmesi aıasynda Aqtóbe qalasyna týrısterdiń keletini týraly Dımash Qudaıbergenniń anasy Svetlana Aıtbaeva oblystyq máslıhat sessııasyndamálim etken bolatyn . Sol kezde jergilikti depýtat Dımashtyń anasynyń qolynan týrısterge shaı berý usynysyn aıtty. Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly óńirge 2 myń qytaılyq keletinin, Dımashqa arnap arnaıy týrıstik baǵdar ázirlengenin jetkizdi . Alaıda arada bir aı ýaqyt ótkenimen, qytaılyq týrısterden habar joq.
«Áli habar joq, kútip otyrmyz»,- dedi Aqtóbe oblystyq syrtqy baılanystar jáne týrızm basqarmasynyń basshysy Ermek Kenjehanuly. Negizgi týrıstik marshrýtty daıyndaǵan «Zere týr» kompanııasynyń dırektory Botagóz Krambaevanyń aıtýynsha, olar ánshi Dımash Qudaıbergen bilim alǵan mektebin, mýzykalyq kolledjin qytaılyqtar tamashalaıtyn oryndar qataryna engizgen.
«Týrıstik marshrýtty daıyndap, qytaılyqtardy qabyldaýǵa ázir otyrmyz. Biraq olardan habar joq. Aldymen shilde aıynda dedi, keıin tamyz aıynda dep aıtty. Anyǵyn eshkim bilmeıdi»,- dedi ol.
