Aqtóbelikter qurbandyq shalý úshin kezekke turdy
Búgin aqtóbelikterdiń esh kedergisiz qurbandyq shalýy úshin barlyq múmkindik jasaldy. Mal bazarlary arnaıy belgilenip, dárigerler tekserý júrgizdi.
«Tańerteńnen bastap bazarǵa kelgen maldyń jaramdylyǵyn tekserip jatyrmyz. Qobda, Yrǵyz, Áıteke bı, Oıyl aýdandarynyń sharýalary maldy arnaıy daıyndap ákelgen. Bárin aralap, qujattaryn qaradyq. Soıǵan maldyń terisi men ishek-qarnyn jınap, zalalsyzdandyrylady», - dedi mal dárigeri Baqytjan Aınaǵulov.
Qurban aıt kúni qozy baǵasy 17-20 myń, toqty 23-25 myń, al qoı baǵasy 25-30 myń teńge boldy. Qasapshylar qyzmetine 3 myń teńge aldy.
Qurban aıt kúni Aqtóbe oblysynyń ákimi Berdibek Saparbaev «Nur Ǵasyr», «Nurdáýlet» meshitterinde boldy.
«Islam - qoǵamdy birigýge shaqyratyn din. Naǵyz musylman árqashan jaqsylyq jasap, jaqyndaryna jamandyq pen zııan keltirmeı, eshkimge zalalyn tıgizbeýi qajet. Imandylyq jolyndaǵylardyń nıeti qashan da taza bolyp, ýaǵyz aıtýǵa baǵyttalýy tıis. Árbir din ustanýshy halyqtyń birligi men konfessııaaralyq kelisimdi nyǵaıtýǵa sebepshi bolýy qajet. Osynyń arqasynda Qazaqstannyń damýy jalǵasady, elimiz beıbitshilik pen kelisimdi saqtaı otyra Prezıdenttiń tapsyrmasyn oryndaıdy»,- dedi Berdibek Saparbaev. Mereke kúni óńir basshysy az qamtylǵan jáne kópbalaly otbasylardyń balalaryna, jetim jáne ata-ana qamqorlyǵynsyz qalǵan balalarǵa mektep quraldaryn berdi.
«Mektepke jol» aktsııasy aıasynda 110 otbasyǵa kómek kórsetildi.
