Aqtóbelikter quqyqbuzýshylyq týraly aqparat úshin syıaqy alyp júr
AQTÓBE. QazAqparat - Aqtóbede polıtseılerdiń 1 myńnan astam qoǵamdyq kómekshisi bar. Olarǵa ótken jyly 2 mıllıon teńge syıaqy berildi, dep habarlaıdy QazAqparat tilshisi.
Aqtóbede polıtsııa qyzmetkerleri qarapaıym adamdardyń kómegine muqtaj. Sebebi, óńirde 50 polıtseıdiń orny bos tur. Qazirgi kezde aýla ishindegi qylmystyń der kezinde ashylýyna qarapaıym adamdar jıi kómektesedi.
«Qoǵamdyq kómekshilerdiń arnaıy kýáligi bar. Olar aýla ishinde, qoǵamdyq oryndarda tártip buzǵan adamdardy kórse, polıtsııaǵa habar beredi. Ótken jyly olarǵa jergilikti atqarýshy organnan 2 mıllıon teńge bólindi. Belsendi azamattarǵa syıaqy, alǵys hat beriledi»,- dedi Aqtóbe oblystyq jergilikti polıtsııa qyzmetiniń bastyǵy Qanybek Jaqsyǵalıev.
Sonymen qatar, iri óndiris oryndarynyń jumysshylary men joǵary, arnaýly oqý oryndarynyń stýdentterimen kezdesý ótkizilip, polıtsııaǵa kómek kórsetý týraly memorandýmǵa qol qoıyldy. Olar qoǵamdyq qaýipsizdikti baqylap, qandaı da bir quqyqbuzýshylyqty anyqtaǵan jaǵdaıda polıtsııaǵa habar berýge kelisim berdi.
Qazirgi kezde jergilik atqarýshy organdar qala ishindegi aýlalarǵa beınekamera ornatý jumysyn qolǵa aldy. Bıyl ondaı jerlerge 140 kamera qondyrylady. Sonymen qatar, kóshe qaýipsizdigi men jol erejesiniń saqtalýyn baqylaıtyn 30 kamera ornatylady. Polıtsııa qyzmetkerleri bul shara qylmystyń aldyn alýǵa, kúdiktilerdi der kezinde ustaýǵa septigin tıgizetinine senimdi. Beınekamera Hromtaý, Muǵaljar, Alǵa aýdandaryna da qoıylady. Bul aýdandarda da qylmys jıi tirkeledi.
