Aqtóbelikter qýǵyn-súrgin jáne asharshylyq qurbandaryn eske aldy
Eske alý sharasyna oblys ákimi Ońdasyn Orazalın men qala ákimi Іlııas Ispanov, ardagerler, etno-mádenı birlestik ókilderi, tarıhshylar qatysty.
«Tarıhı derekter boıynsha 1932-1933 jyldary ashtyq pen aýrýdan Qazaqstanda 3 mıllılonǵa jýyq adam kóz jumdy. Ashtyq kezinde balalar men qarttar óte kóp qyryldy. Qarttardyń qyrylýy halqymyzdyń danalyǵy men tájirıbesiniń altyn qoryn shaıqasa, balalardan aıyrylý ultymyzdyń bolashaǵyna, erteńine degen qaýipti kúsheıtti. Barlyǵy 600 myń qazaq ashtyq pen aýrýdan jan saýǵalap, týǵan jerin tastap ketýge májbúr boldy. Keıin Stalındik repressııa boldy. Tek Aqtóbede 7 myń adam aıdaýǵa ketip, 1800-den astamy atý jazasyna kesildi. Bizdiń boryshymyz eldiń birligin saqtap, sol bir zulmat jyldary qurban bolǵan qandastarymyzdyń esimin umytpaý, este saqtaý», - dedi oblys ákimi Ońdasyn Orazalın.
Eskertkish mańyna 1930-shy jyldary Qıyr Shyǵystan Reseı, keıin qazaq jerine qonys aýdarǵan Mars Kım de keldi. Ol Qazaqstandy ekinshi Otanym dep baǵalap, qurmetteıdi.
«Jasym 91-ge kelse de qýǵyn-súrgin qurbandaryn eske alý eskertkishine kelip turmyn. Koreı halqyn baýyryndaı qarsy alyp, qamqor bolǵan qazaq halqyna, Qazaqstanǵa alǵysymdy bildiremin. Munda balalarymyz, nemerelerimiz dúnıege keldi, ósti. Búgin qıyn kúnderdi eske alyp, bárin kóz aldymnan ótkizdim. Asharshylyq, soǵys jyldary men qaıta qurýdy kórgen adam retinde qazaqtardyń meıirimi men qonaqjaılyǵyna bas ıemin», - dedi Mars Kım.
