Aqtóbelikter kóz aýrýlarynyń emin izdep Reseıge barmaıtyn boldy
AQTÓBE. QazAparat - Aqtóbede «Darý jaryǵy» oftalmologııalyq ortalyǵy iske qosyldy. Zamanaýı ortalyqta 6 ota zaly bar, dep habarlaıdy QazAqparat tilshisi.
Aqtóbede kóz aýrýlaryn emdep, ota jasaıtyn biregeı ortalyq iske qosyldy. Memlekettik-jekeshelik seriktestik aıasynda iske qosylǵan ortalyqta 60 kereýet bar. Kúnine 500 adamdy qabyldaıtyn ortalyq Qazaqstannyń batysyn túgel qamtı alady. Ortalyqtaǵy qural-jabdyqtar Germanııa, Avstrııa, Chehııa, Slovakııadan ákelindi.
«Buǵan deıin shetel asyp, aqtóbelikter Reseıdiń Orynbor qalasyna bardy. Endi munyń joly kesilip, naýqastar Reseıden bizge keledi dep josparlap otyrmyz. Sebebi, ortalyqtaǵy mamandardyń bári aldyn-ala Eýropada tájirıbe jınap keldi, sońǵy úlgidegi qural-jabdyqtar jetkizildi», - dedi ortalyq jetekshisi Ǵalymjan Eleýov.
Kóz aýrýlaryn emdeıtin ortalyq mamandarynyń bári jergilikti emdeý mekemesinde jumys istegen. Shetelden maman shaqyrylmady. Ortalyq jetekshisi Ǵ.Eleýovtyń aıtýynsha, aqtóbelik dárigerlerdiń biliktiligi eshkimnen kem túspeıdi. Qurylys jumystary men qural-jabdyq satyp alýǵa barlyǵy 3,8 mıllıard teńgege jýyq qarjy bólindi. Munda balalar men eresekterge memlekettik tapsyryspen em kórsetiledi.
«Elimizdiń batys óńirinde kóz aýrýyna shaldyqqandardy emdeıtin ortalyq, aýrýhana joq. Aqtóbe oblysy boıynsha 2 myńǵa jýyq adam kózin emdetý úshin Reseıge barady eken. Al Qazaqstan boıynsha jylyna 1 mıllıonǵa jýyq adam kóz dárigeriniń kómegine júginedi. Osy kórsetkishti eskerip, jańa ortalyq ashý úshin kásipkerge usynys jasaǵan bolatynbyz. Qurylys 1 jyldan astam ýaqytta aıaqtaldy», - dedi Aqtóbe oblysynyń ákimi Berdibek Saparbaev.
Óńir basshysy óz sózinde mamandar daıyndaý jumysy jalǵasatynyn jetkizdi. Sonymen qatar, memlekettik-jekeshelik seriktestik aıasynda medıtsına qyzmetkerlerine arnalǵan turǵyn úı salý jospary da qarastyrylyp jatyr.
Aıta keteıik, jańa ortalyqqa Marat Ospanov atyndaǵy Batys Qazaqstan memlekettik medıtsınalyq ýnıversıtetiniń oftolmologııa bólimi kóship keldi. Buǵan deıin dárigerler jylyna 2 myńǵa jýyq adamnyń kózine ota jasalǵan. Jańa ortalyqqa kelgen soń olardyń bári qaıta tájirıbe jınap, qural-jabdyqtardy meńgere bastaıdy, sheberlik sabaqtaryna qatysady.
«Jyl ótken saıyn kóz aýrýlaryna shaldyqqan adamdar sany artyp keledi. Bul adamnyń ómir súrý jasynyń ulǵaıýymen, ekologııamen balanysty bolýy múmkin. Kóbine balalar men qarııalarda kóz aýrýy jıi kezdesedi. Qant dıabeti aýrýyna shaldyqqandarda da kóz aýrýlary bar. Ári jańa ortalyqta kózildirik kıgisi kelmeıtin jastarǵa ota jasalady», - dedi medıtsınalyq ýnıversıtetiniń oftolmologııa bóliminiń meńgerýshisi Gúlnar Nazarbaeva.
