Aqtóbelikter kóp jaǵdaıda tistep alǵan ıt pen mysyqty órtep jiberedi
AQTÓBE. QazAqparat - Aqtóbelik veterınarlar tistep, tyrnap alǵan ıt pen mysyqty, aýyrǵan maldy der kezinde veterınarlarǵa tapsyrýdy suraıdy. Sońǵy jyldary qutyrma aýrýynyń belgisi bar mal men janýarly órtep, joıyp jiberý ádetke aınalǵan, dep habarlaıdy QazAqparat tilshisi.
Aqtóbe oblysynda bıyl 471 adam jan-janýar men maldan zardap shegip, dárigerlerge júgindi. Olardy ıt pen mysyq tistep, tyrnap alǵan. Іri qara mal men jylqy tistegenderi de bar. Túlkiden zardap shekken adam oqıǵasy da tirkeldi. Bıyl aldyn alý sharasyna, atý jumystaryna barlyǵy 52 mıllıon teńgege jýyq qarjy bólingen. Nátıjesinde 7 myńnan astam ıt pen 300-den astam mysyq joıyldy.
«It tistep, tyrnap alǵan soń adamdar qorqyp, «maǵan shara qoldanady» dep oılap, bárin jasyryp qalady. Órtep, kómip tastaıdy. Qutyrma aýrýy bar ma, joq pa degen suraqtyń jaýaby tabylmaǵan soń ıesi vaktsınany tolyq alady. Bul durys emes. Halyqty aqparattandyrý kezinde tistegen, tyrnaǵan janýardan synama alý mańyzdy ekenin túsindirý kerek. Máselen, Baıǵanın aýdanynyń turǵyny mal dárigerin kútpeı maldy soıyp, órtep jibergen. Zertteý júrgizgen kezde maldan qutyrma aýrýy anyqtalmady. Bul da shyǵyn»,- dedi Aqtóbe oblystyq qoǵamdyq densaýlyq saqtaý departamenti basshysynyń orynbasary Muhtar Serbaev.
Veterınar dárigerler, zerthana mamandary da tistep, tyrnap alǵan jan-janýar basy jetpeı jatatyn jaǵdaılar tirkeletinin jasyrmady. Keıbiri bıomaterıaldy shiritip jiberedi.
«Zertteýge qajetti materıaldyń kóbi jaramsyz bolyp keledi. Barlyq aýdanda mundaı jaǵdaı bar. Adamdar órtep, shiritip jiberedi. It pen mysyq bolsa túgel jetkizip, iri qara bolsa maldyń basyn ákelý shart. Biz mıǵa zertteý jasap, qutyrma aýrýyn anyqtaımyz»,- dedi respýblıkalyq veterınarııa zerthanasynyń oblystyq fılıaly dırektorynyń orynbasary Gúlsim Naımanova.
Aıta keteıik, Aqtóbe oblysynyń Yrǵyz, Shalqar, Qobda aýdandarynda qutyrma aýrýy anyqtalyp, shekteý qoıylǵan bolatyn. Qazir Yrǵyz aýdanyndaǵy shekteý áli bar.
