Aqtóbelikter kólik salyǵyna 240 mln teńge bereshek

AQTÓBE. QazAqparat – Kólik salyǵyn tólemegen aqtóbelikterdiń temir tulparlary aıyp turaǵyna qoıylyp jatyr, dep habarlaıdy QazAqparat tilshisi.

Qalalyq polıtsııa basqarmasy, jeke sot oryndaýshylary jáne qalalyq memlekettik kirister basqarmasy Aqtóbede reıd ótkizip jatyr. Jol boıynda kólikterdi toqtatyp, olarǵa bereshegi týraly eske saldy.

«Jyl basynda bereshek 560 mln teńgeni qurady. Onyń 240 mln teńgesi áli de ótelmedi. Júrgizýshilerge Salyq kodeksi túsindirildi. Eger osylaı júre berse, olardyń jeke esepshottary buǵattalyp, shetelge shyǵýǵa tyıym salynady. Turǵyndardan bereshekti ýaqytyly óteýdi suraımyz», - dedi Aqtóbe qalalyq memlekettik kirister basqarmasyny orynbasary Aıbol Jumabaev.

Aqtóbe qalasy boıynsha 3200-den astam kólik ıesi salyq organdaryna qaryz. Olardyń isi boıynsha sot sheshimi qazir jeke sot oryndaýshylardyń qolynda. «Boryshker» aktsııasy aıasynda kólikter toqtatylyp jatyr.

«Qazirgi kezde oblys boıynsha salyqty óndirip alýǵa 5 myń uıǵarym berilgen. Sonymen birge 26 myńnan astam ákimshilik aıyppul bar. Qazir «Avtoquıyn» júıesine bereshek adamdar týraly málimet engizildi. Eger kóshede qaryzy bar adamnyń kóligi anyqtalsa, toqtatylady. Qaryz adam sol sátte bereshegin óteıdi. Bolmasa kólik aıyp turaǵyna qoıylady. Kúnine 7-8 kólik avtoturaqqa qoıylyp jatyr», - dedi aımaqtyq sot oryndaýshylary palatasy basshysynyń orynbasary Azamat Egizbaev.