Aqtóbelikter Kókjar jármeńkesiniń 150 jyldyǵyn atap ótti
AQTÓBE. QazAqparat - Aqtóbe Uly Jibek jolyndaǵy jańǵyrǵan Kókjar jármeńkesiniń 150 jyldyǵyn atap ótti. Jármekege Atyraý, Mańǵystaý, Qyzylorda, Batys Qazaqstan oblystarynyń jyrshylary men sharýa qojalyqtarynyń ókilderi qatysty, dep habarlaıdy QazAqparat tilshisi.
Kókjar jármeńkesiniń 150 jyldyǵy aıasynda Aqtóbede Qazaqstan saýda tarıhynda Kókjar jármeńkesiniń alatyn orny, saıası mańyzdylyǵy týraly ǵylymı konferentsııa ótti. Al Tahaýı Ahtanov atyndaǵy oblystyq drama teatr Tabyl Qulııastyń «Muhıt» qoıylymyn sahnalady. Óńirge jınalǵan Atyraý, Mańǵystaý, Qyzylorda, Batys Qazaqstan jáne Aqtóbe oblystarynyń jyrshylary «Jan serigim - dombyra» atty baıqaý ótkizdi.
Jármeńkeniń 150 jyldyǵynda tarıhı saýda ornynda aýyl sharýashylyǵy jármeńkesi ótip, qolóner sheberleri óz buıymdaryn satýǵa shyǵardy. Barlyǵy 4 tonnaǵa jýyq et satylyp, sút jáne sút ónimderi, qurt pen ishimshik jármeńkege kelýshilerdiń suranysyna ıe boldy.
«Jibek jolynyń boıynda Kókjar, Qoıandy jármeńkeleri ornalasqan. Osynyń barlyǵy qazaq tarıhyn kórsetedi. Qazaq tek qoı baqpaǵan, sol kezde de kásipkerlikpen, saýdamen aınalysyp, óner, mádenıetti damytqan. Tarıhsyz bolashaq bolmaıdy degen sóz bar. Barlyǵynyń óz negizi bar. 25 jyldaǵy damýymyz ben jetistigimiz ata-babamyzdyń qany men teriniń arqasynda dep bilemiz. Qazaqstan álemge tanyldy, elimizdi álem moıyndady. Halyqaralyq deńgeıdegi sammıtter, forýmdar Memleket basshysy Nursultan Nazarbaevtyń durys júrgizip otyrǵan ishki jáne syrtqy saıasatynyń arqasynda uıymdastyrylyp jatyr. Damyǵan 30 eldiń qataryna ený úshin ekonomıka, saıasat, rýhanı jaǵynan damýymyz kerek. Daǵdarystar bolsa da elimizde áleýmettik salaǵa bólingen qarjy tómendegen emes. Bizge qajeti - rýhanı baılyq. Biz ózimizdiń sana-sezimizdi damytýymyz kerek. Sonyń biri Oıyl aýdanyndaǵy Kókjar jármeńkesi. Bul - óskeleń urpaqqa sabaq, ónege»,- dedi Aqtóbe oblysynyń ákimi Berdibek Saparbaev.
Jármeńke kezinde 25 kıiz úı tigilip, ulttyq sport túrlerinen jarystar ótti.
Aıta keteıik, Kókjar jármeńkesi 1967 jyly alǵashqy jumysyn bastady. Qazaq jerinde bolǵan jármeńkelerdiń orny saqtalǵanymen, ǵımarttary buzylǵan. Al Kókjar jármeńkesindegi saýda qatarlary men jármeńke komıtetiniń úıi saqtalyp, jańartyldy. Oıyl aýdandyq murajaıynda jármeńke kezinde satylǵan kúmis qasyq, shaı qoraptary men qysh ydystar, jármeńke kezinde túsirilgen sýretter saqtaýly tur. Kóktem men kúzde ótkizilgen jármeńke týraly qundy qujattar Orynbor murajaıynan tabylyp jatyr.
