Aqtóbelikter kez kelgen jerge býkmekerlik keńse ashyp alýdy ádetke aınaldyrǵan
AQTÓBE. QazAqparat - Aqtóbede 100-den astam býkmekerlik keńse bolsa, onyń 42-si ǵana salyq organdaryna tirkelip, zańdy jumys istegen. Ózgesi salyqtan jaltaryp, zańsyz jumys istegen, dep habarlaıdy QazAqparat tilshisi.
Aqtóbe oblystyq Іshki ister departamenti men prokýratýra óńirdegi oıyn bıznesin tekserdi. Oblystyq memlekettik kirister departamentine tirkelip, zańdy jumys istep turǵan 42 býkmekerlik keńse bar eken. Qala kóshelerin tekserý, baqylaý kezinde oblysta barlyǵy 137 keńse bar ekeni anyqtalǵan. Kóbi Aqtóbe qalasynda. Sonymen qatar, Hromtaý, Shalqar, Muǵaljar, Temir aýdandarynda da býkmekerlik keńse jumys istep kelgen.
«Barlyǵy júzge jýyq oıyn mekemesi salyq organdaryna tirkelmesten jumys istegen. Olar osy kúnge deıin lıtsenzııasyz qyzmet kórsetip kelgen. Býkmekerlik keńselerdiń 9 kassasy memlekettik kirister departamentiniń tirkeýine alyndy. Reıdtik tekserýden soń salyq zańnamalaryn saqtamaǵan 2 keńse boıynsha is sotqa joldandy. Al 34 kassa zańsyz qyzmetin óz erkimen toqtatty. Sonymen qatar, qalanyń barlyq býkmekerlik keńseleriniń elektrondy kartasy ázirlendi. Kartada olardyń ornalasqan mekenjaıy, atalǵan qyzmetpen aınalysýǵa sáıkestik lıtsenzııasynyń bar-joǵy, ýákiletti organda tirkeýde bolý-bolmaýy týraly málimetter kórsetilgen», - dep habarlady oblystyq prokýratýranyń baspasóz qyzmeti.
Aıta keteıik, ótken jyly 7 býkmekerlik keńsege shabýyl jasalǵan. Bıyl bir derek tirkeldi.
«Zańsyz oıyn bıznesine qarsy is-qımyl jumysyna Býkmekerlerdiń ózin-ózi retteý Assotsıatsııasy tartyldy. Oblys prokýratýrasynyń qoldaýymen memlekettik kirister departamenti men assotsıatsııasy arasynda yntysmaqtastyq pen ózara túsinistik memorandýmyna qol qoıý josparlanýda. Kelisimge sáıkes Assotsıatsııa bizderge zańsyz býkmekerlik keńseler týraly aqparattardy usynady. Sonymen qatar, prokýratýra oıyn bıznesi týraly qoldanystaǵy zańnamaǵa ózgerister engizý boıynsha usynystar ázirledi. Mindetti rezervtiń bolýy, kassalardyń jeke oqshaý turǵan turǵyn úı-jaıǵa jatpaıtyn ǵımarattarda ornalasýy, beınekameralardyń bolýy mindettelýi tıis»,- dedi oblys prokýratýrasy.
