Aqtóbelikter ıt atýǵa ruqsat berýdi surady
Qazir Aqtóbe oblysynda ıtti aýlaý jáne joıý jumystarymen úsh top aınalysyp jatyr. 12 jasar Madııar Shákirattyń óliminen keıin bul jumys qarqyn ala tústi. Búgin aqtóbelikter oqýshy bilim alǵan №60 orta mektepke jınalyp, ony bir mınýt únsizdikpen eske aldy. Keıin qańǵybas ıtterge qatysty máseleni jedel sheshýdi surady.
«Eset batyr turǵyn alabynyń turǵynymyn. 6 jyldan beri osy shaǵyn aýdanda turamyn. Úsh balam №60 orta mektepte oqıdy. Túrli úıirmelerge barady. Jalǵyzbasty anamyn, balamnyń úlkeni 10 jasta. Tańnan keshke deıin balamdy mektepke, túrli úıirmege tası almaımyn. Sebebi balalarymdy asyraý úshin jumys isteýim kerek. Olardyń erkin júrgenin qalaımyn. Qazir úıden shyǵara almaı otyrmyn. Qamap qoıdym. Itten qorqamyz», - dedi Eset batyr turǵyn alabynyń turǵyny Indıra Asylbekqyzy.
Buǵan deıin dál osy turǵyn alabynda qyz balany ıt talaǵan bolatyn. Bala ólimnen aman qaldy. Jınalysqa qatysqan anasy Altyngúl Jarylǵapova oqıǵany baıandap, ıt qapqan kezde qyzynyń ústinde bolǵan kıimdi kórsetti. Yrym-jyrymy shyqqan kıimnen-aq ıttiń qalaı talaǵanyn kórýge bolady.
«2021 jyldan beri osy problemany kórip kelemin. Qoqystyń arasynda únemi ıt júredi. Ákimdik máseleni qolǵa alýy kerek edi. Osy iske veterınalar da kináli. Olar ıttiń sanyn anyqtap, atý úshin shara qoldanýy qajet edi. Biz de der kezinde aıtyp, máseleni kótergende mundaı qaıǵyly jaǵdaı bolmas pa edi? Qyzymdy ıt talady. Ákimdik, prokýratýraǵa bardym. Ár jerge jumsady. Aryz jazdym. «It atýǵa bolmaıdy» degen zań shyqqanyn aıtyp otyr. Bári basyn ala qashady. Itti óltirdik, atty degen joq. Eshkim jaýapkershilikti moınyna alǵysy kelmeıdi. Balamnyń jaǵdaıy jaqsy dep aıta almaımyn. Tán jarasy jazylar, biraq ishki dúnıesin kim emdeıdi? Psıhologpen de keńestik» , - dedi Altyngúl Jarylǵapova.
Aıta keteıik, Madııar Shákirattyń ólimine qatysty qylmystyq is qozǵalyp, tergeý júrip jatyr.
Búgin Ortalyq kommýnıkatsııalar qyzmetinde brıfıng ótkizgen oblys ákimi Ońdasyn Orazalın kelesi jyly ıtterge chıp taǵylatynyn aıtty.
