Aqtóbelikter eski úılerin jóndetý úshin aldyn ala aqsha jınaýy kerek
AQTÓBE. QazAqparat - Aqtóbe qalalyq turǵyn úı ınspektsııasy kópqabatty úıdi termojańǵyrtý úshin aldyn-ala qarjy jınaýdy usyndy. Biraq esepshot ashyp, aqsha jınaǵan eshkim joq, dep habarlaıdy QazAqparat tilshisi.
Termojańǵyrtý baǵdarlamasymen Aqtóbede 137 kópqabatty úı jóndeldi. Shatyr jabý, jertóleni tazartyp, elektr jelisin jańartý, syrlaý jumystary júrgizildi. Bári turǵyndardyń kelisimimen jasaldy. Alǵashqy jyldary jóndeý jumystaryn júrgizgen páter ıeleri aı saıyn berejaqty ótep otyr. Jınalǵan qarjy jyl saıyn tizimde turǵan eski úıdi qalpyna keltirýge jumsalady. Bıyl Aqtóbe oblysynda 5 úı jóndeldi. Jergilikti ákimdik kezekte turǵan kópqabatty úı turǵyndaryna arnaıy esepshot ashyp, qarjy jınaýdy usyndy. Bul jóndeý jumysyn júrgizý ýaqytyn jedeldetýge, alǵan qaryzdy buryn óteýge múmkindik beredi.
«Termojańǵyrtý baǵdarlamasy arqyly kópqabatty turǵyn úılerdi jóndeý jospary bar, tizim jasaldy. Biraq kim birinshi, kim ekinshi dep kezek júrgizilmeıdi. Aldymen eski úıdi tańdaımyz, keıin turǵyndardyń kelisimin alamyz. Eger turǵyndar kelisse jobalyq-smetalyq qujat ázirlep, merdiger mekeme anyqtalady. Aldaǵy ýaqytta «Turǵyn úı qatynastary týraly» Zańyna sáıkes arnaıy esepshot ashyp, turǵyndardyń sol esepshotqa aqsha jınaýyn qadaǵalaımyz. Eger turǵyndar aqsha jınasa, jóndeý jumystary birinshi jasalady. Ári turǵyndar qaryzyn tez óteı alady»,- dedi Aqtóbe qalalyq turǵyn ınspektsııasynyń basshysy Haıdar Ermashev.
Esepshot ashý, aqsha jınaý usynysy aıtyldy, biraq bul joba boıynsha eshkim jumys istep jatqan joq.
