Aqtóbelikter Elbasy maqalasyndaǵy tapsyrmalardyń oryndalýyna usynys bildirdi
AQTÓBE. QazAqparat - Aqtóbelikter Elbasynyń «Bolashaqqa baǵdar: rýhanı jańǵyrý» maqalasyn talqylaýǵa baǵyttalǵan biryńǵaı respýblıkalyq kúninde basqosty, dep habarlaıdy QazAqparat tilshisi.
Ulttyq múddeni qorǵap, salt-dástúrimizdi jańǵyrtýǵa, týǵan jerdiń mádenı-tarıhı eskertkishterin qaıta qalpyna keltirip, qorǵaýǵa, patrıottyq sezimdi oıatýǵa baǵyttalǵan «Bolashaqqa baǵdar: rýhanı jańǵyrý» atty maqala Aqtóbe halqyna túsindirilip jatyr. Búgin biryńǵaı respýblıkalyq kúnge oraı Qazaqstan halqy Assambleıasynda etnomádenı birlestikter, qoǵamdyq kelisim ókilderi, jastar bas qosty. Kezdesýde usynystar aıtyldy.
«Jastarymyz «Bolashaq» baǵdarlamasymen shetelde oqyp jatyr. Aldy bilim alyp kelgen-di. Ókinishtisi, olardyń keıbiri týǵan tilinen qashyqtap bara jatqan syndy. Týyp-ósken atamekeni týraly jetkilikti maǵlumat bilmeıdi. Elbasy maqalasynda aıtylǵan «Týǵan jer» baǵdarlamasy osy úshin kerek. Memleket basshysy Nursultan Nazarbaev jumystyń baǵytyn kórsetip, tapsyrmalar da berdi»,- dedi halyqaralyq «Qazaq tili» qoǵamynyń Aqtóbe oblystyq fılıaly tóraǵasynyń orynbasary Jańǵabyl Qabaqbaev.
Onyń aıtýynsha, maqaladaǵy tapsyrmalar men mindetterdiń oryndalýy aýyldar men aýdandar da talqylandy. Mádenı, tarıhı eskertkishterdi qorǵaý, qalpyna keltirý jumystary sol aýyldyń aqsaqaldary, aǵa býyn estelikteri arqyly jınaý usynyldy.
«Qazaqstan halqy Assambleıasy elimizde bolyp jatqan tyń ózgerister men eldiń damýyna úles qosatyn saıası qujattarǵa únemi qoldaý bildiredi. Assambleıa fılıaly Aqtóbede turatyn 90-ǵa jýyq ulttyń basyn biriktirip otyrǵan qara shańyraq, berekeli uıym. Biz Elbasynyń maqalasyn etno-mádenı birestik basshylarymen talqylap, el pikirin bildik. Táýelsizdiktiń 25 jyldyǵynda elimizde bilim, mádenıet, sport salasynda jańǵyrýlar bolyp, áleýmettik baǵdarlamalar qabyldandy. Munyń barlyǵy az ýaqyt ishinde nátıjeli júzege asyrylyp, halyqtyń ıgilikti ómir súrýine septigin tıgizip otyr. QHA músheleri osy únge ún qosyp, elimizdiń bolashaǵynyń jarqyn bolýyna, el ishindegi aýyzbirshilikti keńinen damytýǵa úles qosa beredi»,- dedi Aqtóbe oblysy boıynsha Qazaqstan halqy Assambleıasynyń sekretarıat meńgerýshisi Bulbul Eleýsinova.
