Aqtóbelikter depýtattardan gaz baǵasyna qatysty máseleni qaıta qaraýdy surady
AQTÓBE. QazAqparat - Aqtóbe turǵyndary Májilis depýtattarynan gaz baǵasyn jylyna bir ret qana kóterýdi surady, dep habarlaıdy QazAqparat.
Aqtóbege Májilis depýtattary Gleb Şegelskıı, Quralaı Qaraken, Danııa Espaeva kelip, «QazTransGazAımaq» AQ oblystyq fılıalyna bardy. Aqtóbe oblystyq máslıhat depýtattary buǵan deıin QR Energetıka mınıstrligine usynys berse, bul joly óz tilekterin Májilis depýtattaryna aıtty.
«Qazirgi kezde gaz baǵasy jylyna eki ret qaralady. Bizge zań boıynsha jylyna bir ret qaralyp, ózgertilgeni mańyzdy. Sebebi, ınvestıtsııalyq jobalardy iske asyrý kezinde naqtylyq kerek»,- dedi Aqtóbe oblystyq máslıhatynyń hatshysy Sánııa Qaldyǵulova.
Negizinen 2016 jyldyń tamyz aıynda gaz ótkizý baǵasy 12 paıyzǵa kóterildi, al bıyl qańtarda turǵyndar úshin 4, al ózge tutynýshylar úshin 8 paıyzǵa artty. Tarıf kóterý jylyna eki ret qaralyp, quptalyp jatyr. Depýtattar jergilikti turǵyndardyń usynysy Májiliste qaralatynyn jetkizdi.
«Oblystyq máslıhat depýtattary Májiliske tarıf týraly usynysyn aıtty. Olar tarıfti jylyna tek bir ret kóterý jaıyn aıtty. Bul bıznes josparǵa, ınvestıtsııalyq baǵdarlamalardy iske asyrýǵa yńǵaıly eken. Aldaǵy ýaqytta biz usynysty qarap, Májiliske Energetıka mınıstri men QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetin shaqyramyz»,- dedi Májilis depýtaty Gleb Şegelskıı.
