Aqtóbelikter dala órti kezinde qaza bolǵandardy sońǵy saparǵa shyǵaryp saldy
AQTÓBE. QazAqparat - Búgin aqtóbelikter dala órtin sóndirý kezinde qaza bolǵan aýyl ákimi Batyrbek Birlepesov pen muǵalim Joldybek Ábdisálimovti aqtyq saparǵa shyǵaryp saldy. Erteń ajal qushqan taǵy eki aýyl turǵynyn -Jomart Smaılov pen Jańabaı Ábishevti jerleý rásimi ótedi, dep habarlaıdy QazAqparat tilshisi.
Oqıǵanyń mán-jaıyn habarlaǵan aýyl turǵyny, órt ortasynda qalyp, kúıik shalǵan adamdar aýdan ortalyǵyndaǵy aýrýhanaǵa aýyl ákiminiń kóligimen jetkizilgenin aıtty.
«Sulýkól aýylynda birneshe kún boıy órt boldy. Bólem Jomart Smaılov sol kúni órt ortasynda qalǵan. Denesiniń bárin kúıik shaldy. Ústinde arnaıy kıim bolmady, órt sóndirýshiler oqıǵanyń sońynda aýylǵa keldi. Oǵan deıin eshkim bolmady. Aýyl halqy órt jaqyndaǵan soń «mal órtenip ketedi» dep shyǵyp, jumyldy. Jádel járdem kóligimen emes, aýyl ákiminiń «Nıva» mashınasymen aýdandyq aýrýhanaǵa jetkizdik. Jomart óz aıaǵymen júrip, kólikke mindi. Aýrýhanada 3 kún jatty. Esin bildi»,- dedi aýyl turǵyny Serik Myrzaǵalıev.
Aıta keteıik, Aqtóbe oblysy, Áıteke bı aýdany, Sulýkól aýylynda 120 úı bar. «Jomart Smaılovtyń eki qaryndasy turmysqa shyqqan. Ol anasymen birge turyp keldi. Qazir anasy jalǵyz qalyp otyr. Densaýlyǵy nasharlap ketti», - dedi Serik Myrzaǵalıev.
Eske salsaq, Sulýkól aýylynda tutanǵan dala órtimen kúres kezinde 4 adam qaza tapty . Oqıǵa ornynda aýyl ákimi Batyrbek Birlepesov kóz jumdy. Ózge úsheýi aýrýhanada qaıtys boldy.
Órt kezinde kúıik shalǵan aýyl turǵyndaryna em kórsetý úshin oblys ortalyǵynan arnaıy mamandar barǵan.
«Aýdandyq aýrýhanadan shaqyrý 4 qyrkúıek kúni tústi. Keshkilik habar túsken soń sanavıatsııamen bara almady. Travmatolog, kombýstıolog, reanımatologtary bar brıgada reanımobılmen ketti. Túnde naýqastardyń bárin qarap, kómek kórsetti. 5 qyrkúıekte brıgada oblys ortalyǵyna qaıta kelip, 6 qyrkúıekte telemedıtsınamen baılanysqa shyǵyp, dárigerler keńes berdi. Naýqastardyń denesi 90-100 paıyz kúıip qalǵan. Sanavıatsııa aýdandyq aýrýhanaǵa taǵy baryp, sol jerde kómek kórsetti. Biraq olar tasymaldaýǵa jaramady. Biz Astana qalasyndaǵy kombýstıologpen de tikeleı baılanysqa shyqtyq»,- dedi Aqtóbe oblysy boıynsha sanavıatsııanyń aımaqtyq koordınatory Elmıra Ýrýnbaeva.
