Aqtóbelikter Býrabaıǵa ushaqpen jete alady
ASTANA. QazAqparat - Reseıden keletin týrıster úshin de birneshe reısti ashý josparlanǵan, dep xabarlaıdy QazAqparat tilshisi.
Aqmola oblysy ákiminiń orynbasary Vasılıı Krylovtyń aıtýynsha, Kókshetaý áýejaıyn qaıta qurý jumystary aıaqtalǵannan keıin qosymsha ishki áýe reısteri ashylatyn bolady.
«Atalǵan reıster Halyqaralyq áýejaı (Astanadaǵy Nursultan Nazarbaev atyndaǵy Halyqaralyq áýejaı - avt.) arqyly júrgiziledi. Sonyń ishinde Aqtóbe qalasy da bar. Budan bólek, Reseıden keletin týrıster úshin birqatar reısterdi ashý máselesi pysyqtalyp jatyr. Olar - Omby, Orynbor men Ekaterınbýrg», - dedi V.Krylov búgin Şýchınsk-Býrabaı kýrorttyq aımaǵyn damytý máselelerine arnalǵan jıynda.
Onyń aıtýynsha, aǵymdaǵy jylda Reseıden Býrabaıǵa deıingi tóte joldy da ashý josparlanyp otyr. Atalǵan jol «Odesskoe» shekara beketinen bastalyp, Soltústik Qazaqstan oblysynyń Bıdaıyq, Ilıchevka sııaqty eldi mekenderin basyp ótedi. Sonyń arqasynda Býrabaıǵa keletin reseılikter joldyń uzaqtyǵyn 150 shaqyrymǵa qysqarta alady.
Aıta keteıik, búgingi shara barysynda Býrabaıda ashylatyn jańa nysandar tanystyryldy.
Al QR Mádenıet jáne sport mırıstri Arystanbek Muxamedıuly Býrabaıdy Las-Vegasqa aınaldyrýdyń jolyn usyndy.
