Aqtóbelikter búgin kıim-keshek, azyq-túlik tıelgen júk kóligin Qostanaıǵa jóneltti
Aqtóbelikter Qostanaı jerindegi alapat órtten zardap shekkenderdi qoldaý maqsatynda búgin azyq-túlik, kıim-keshek jınady.
«Qostanaı oblysynda bastalǵan tabıǵı órtter jáne kóp zardap shekken otbasylarynyń balalary týraly habardan keıin Aqtóbe oblysynyń ákimi Eraly Toǵjanov zardap shekken aýdandarǵa gýmanıtarlyq kómek kórsetýdi uıymdastyrý jónindegi jedel shtab qurýdy tapsyrdy. Aqtóbelikter kórshi óńirdiń Áýlıekól, Uzynkól jáne Qarabalyq aýdandarynyń turǵyndaryna moraldyq jáne materıaldyq gýmanıtarlyq kómek kórsetýge daıyn ekenin bildirdi. Aqtóbe oblysynyń ákimdigi kórshi oblysqa dári-dármekter, kıim-keshek, azyq-túlik, jeke gıgıena zattary jáne t.b. gýmanıtarlyq avtokerýen jiberdi. «AMANAT» partııasynyń fılıaldarynda 13 gýmanıtarlyq kómek pýnktteri ashyldy. Oǵan nemquraıly emes azamattar kıim, tósek-oryn jabdyqtaryn jáne birinshi kezekte qajetti zattardy alyp kelip jatyr»,- dep habarlady oblys ákiminiń baspasóz qyzmeti.
Sonymen birge oblystyń ortalyq meshitte kómek shtaby quryldy. Ol jerde kıim-keshek, azyq-túlik, qarjy jınaý jumysyn ımam júrgizedi.
Aıta keteıik, «Aqtóbe» fýtbol klýbynyń basqarma tóraǵasy Erlan Jamantaevtyń aıtýynsha, Aqtóbe-Qyzyljar oıyny kezinde bıletten túsken qarjynyń bári qostanaılyqtar úshin ashylǵan arnaıy qorǵa aýdarylady. Sonymen birge klýbtyń demeýshileri de qarjy aýdarmaq. Olardyń arasynda jankúıerler toby bar.
