Aqtóbelikter baspanalary qulap kete me dep úreılenip otyr

Aqtóbe qalasyndaǵy Máskeý kóshesinde turatyn adamdar dabyl qaǵyp otyr. Sońǵy aılarda páter ishi men kireberisinde adam saýsaǵy sııatyn syzat paıda boldy. Bala-shaǵaly otbasy úshin baspaldaqpen túsý, kún saıyn sylaǵy ketip jatqan tóbeni qaraý, qabyrǵadaǵy syzattyń santımetrin sanaý qıynǵa soǵyp tur. 1988 jyly salynǵan úıde 106 páter bar. Syzat №17 páterde anyq kórinedi.

«Bizdiń as bólme men vannamyzdan syzat bilindi. Bul úsh aı buryn paıda bolyp, kún ótken saıyn ulǵaıyp barady. Qatty qorqamyz. Túni boıy uıyqtaı almaımyz. Bir kúni úı ortasyna túsip, biz úıindi astynda qalamyz dep úreılenemiz. Balamyz úshin alańdaımyz. Ákimdikke barǵan edik, biraq naqty jaýap bolmady. Bireýi buryn apatty dep tanylyp, tizimge alynǵan dedi. Ekinshisi apatty dep tanylmaǵan, turǵyndar jeke kompanııaǵa tekserý jasatýy kerek dep jaýap qaıtardy»,- qala turǵyny Móldir Atshybaeva. 

Aqtóbe qalalyq turǵyn úı ınsektsııasy bul úıdegi jaǵdaımen tanys. Úıdiń tehnıkalyq qujaty, jer aktisi bar. Biraq sońǵy eki jyl boıy kondomınnıým bolyp jumys istegen N.Esqalın bul úıge qyzmet kórsetýden bas tartyp, qujattaryn turǵyn úı ınspektsııasyna tapsyrdy. Anyqtalǵany, turǵyn úıdegi páterlerdiń kóbi jalǵa beriledi. Kútip ustaýǵa qarjy bólinbegen, tazalyqty saqtaýǵa kóbiniń qulqy joq.

«Turǵyn úıdi aldymen arnaıy mamandar qarap, tekserip, qorytyndy shyǵarý kerek. Eger apatty dep tanylsa, sol qorytyndy qalalyq komıssııaǵa usynylady. Bárine turǵyndar kináli. Olar kútip ustamaǵan, jóndeý júrgizbegen. Jertóle únemi sýǵa toly bolyp, qabyrǵaǵa syzat tústi»,- dedi Aqtóbe qalalyq turǵyn úı ınspektsııasynyń basshysy Haıdar Ermashev.

Erteń qalalyq ákimdik mamandary men turǵyndar kezdesý ótkizedi. Sol kezde turǵyndarǵa qarjy jınap, arnaıy tekserý júrgizý usynylady. Bul qujat bolmasa ákimdik turǵyndardyń aryz-shaǵymyn qaramaıdy.

Aıta keteıik, Aqtóbe qalasynda 20-dan astam apatty úı bar. Onda 60 otbasy turyp jatyr.