Aqtóbelikter balyq pen qus ósirýdi úırendi
AQTÓBE. QazAqparat - Aqtóbede «Bastau Bıznes» jobasy aıasynda 500-den astam aýyl turǵyny oqytyldy. Aýyl turǵyndary balyq, qus ósirip, óz kásibin ashty, dep habarlaıdy QazAqparat tilshisi.
Aqtóbe oblysynda «Bastau Bıznes» jobasy iske asyrylyp jatyr. Yrǵyz, Oıyl, Muǵaljar, Temir, Mártók jáne Shalqar aýdandarynyń turǵyndary aldymen bir aı boıy bıznes álippesin úırenip, keıin óz jobalary boıynsha kásippen aınalysýǵa múmkindik aldy. Jyl basynan beri 500-den astam aýyl turǵyny kásipkerlik negizderin oqydy. Qazir taǵy 200-ge jýyq aýyl turǵyny bıznes josparyn qurýdy meńgerip júr. Jumyssyzdar men kásibin keńeıtýdi josparlap júrgen kásipkerlerge arnalǵan joba qatysýshylary tegin bilim ala alady.
«Bastau Bıznes» jobasy aıasynda bilim alyp, 4,5 mıllıon teńge nesıe aldym. Balyq sharýashylyǵyn damytýdy kózdep otyrmyn. Sý toǵanyn jasaýǵa arnalǵan býldozer satyp aldym. Endi sýǵa arnalǵan nasos alamyn. Kóktemde sý jınap, balyqtyń úsh túrin ósirý qajet. Bul meniń ákemniń armany bolatyn. Jańa isti bastap, balalaryma sharýashylyqty úıretkim keledi»,- dedi jas kásipker Nurlan Mahanov.
Jobaǵa qatysqan Erlan Sısenov qus ósiredi. Ol bıznes jospar jasap, qazir óz qarjysyna taýyq satyp aldy. Keler jyly memlekettik baǵdarlamamen sharýashylyǵyn keńeıtýdi josparlady.
«Turaqty jumysym bolmady. Kúzetshi, dánekerleýshi, taksı júrgizýshisi boldym. Keıin «Bastau Bıznes» jobasyna arqyly bıznes jospar qurýdy úırenip aldym. Aldaǵy ýaqytta qus eti men jumyrtqa satamyn»,- dedi Erlan Sısenov. Al «Bastau Bıznes» jobasymen oqyǵan Aqtóbe oblysy, Oıyl aýdanynyń turǵyny Aqnur Ǵazızova balabaqsha qurylysyn qolǵa aldy. 23 jastaǵy kásipker 50 oryndy balabaqsha qurylysyn jeltoqsan aıynda aıaqtamaq.
«Ózim pedagogpyn. Balabaqsha qurylysy aıaqtalyp, iske qosylǵan soń 20 adamdy jumyspen qamtyp, memlekettik tapsyrysty oryndaımyz»,- dedi ol. Aıta keteıik, bul Aqtóbe oblysy, Oıyl aýdanyndaǵy eń iri bıznes joba. Bıyl óńirde barlyǵy 1 myńnan astam adamǵa bıznes negizderi úıretiledi.
