Aqtóbelikter Azııa chempıonyn áýejaıdan kútip aldy
AQTÓBE. QazAqparat - Aqtóbelikter Azııa chempıony atanǵan balýan Nurıslam Sanaevty áýejaıdan kútip aldy. Bishkek qalasynda ótken jarysta altyn medal alǵan sportshy jazǵy Azııa oıyndaryna qatysady, dep habarlaıdy QazAqparat tilshisi.
Aqtóbelikter búgin halyqaralyq áýejaıǵa jınalyp, chempıondy qarsy aldy. Uran sózder jazylǵan plakattardy ustaǵan jastar el namysyn qorǵaǵan sportshyǵa rızashylyqtaryn bildirip jatty. Al sportshy ózine qoldaý bildirgen óńir turǵyndaryn alǵysyn aıtty.
«Men óńir basshysy Berdibek Saparbaevqa, oblystyq sport basqarmasyna, jattyqtyrýshyma alǵys aıtamyn. Bul joly senimdi aqtadym. Alda úlken jarys kútip tur. Endi jazǵy Azııa oıyndaryna daıyndyqty bastaımyn»,- dedi Azııa chempıony Nurıslam Sanaev.
Aıta keteıik, 27 aqpan - 4 naýryz kúnderi aralyǵynda Bishkek qalasynda grek-rım, erkin jáne áıelder kúresinen Azııa chempıonaty ótti. Chempıonatqa Aqtóbe oblysynan 3 sportshy qatysyp, olar 2 altyn, 1 qola medal jeńip aldy. Balýan Nurıslam Sanaev oblys tarıhynda alǵash ret 61 keli salmaqta erkin kúresten Azııa chempıony atandy. Endi ol 2018 jyldyń 18 tamyz - 2 qyrkúıegi aralyǵynda Djakartada (Indonezııa) ótetin XVIII jazǵy Azııa oıyndaryna barady. Sonymen qatar, Meırambek Aınaǵulov Bishkekte ótken Azııa chempıonatynda 63 keli salmaq boıynsha grek-rım kúresinen qola júldege ıe boldy. Al Aıjan Ismaǵulova 58 keli salmaqta grepplıngten Azııa chempıonatynyń jeńimpazy atandy.
Aqtóbe oblystyq sport basqarmasynyń baspasóz qyzmetiniń habarlaýynsha, Djakartada ótetin Azııa oıyndaryna Aqtóbeden samboshy Eset Qýanov, ziltemirshi Farhad Harkı jáne balýan Nurıslam Sanaev barady dep josparlanǵan. Alda birneshe sportshy joldama alady dep kútilýde. 
