Aqtóbelikter áleýmettik jelide memlekettik organdarmen baılanys ornatty
AQTÓBE. QazAqparat - Aqtóbedegi barlyq memlekettik organdar men aýdan ákimderi áleýmettik jelilerde óz akkaýnttaryn ashty, dep habarlaıdy QazAqparat tilshisi.
Aqtóbede oblystyq basqarmalar men aýdandyq ákimdikter, qaladaǵy memlekettik bólimder áleýemettik jelilerde óz paraqshalaryn ashty. Onda kez kelgen turǵyn suraq qoıyp, oǵan jaýap ala alady.
«Bul jumys Memleket basshysy Nursultan Nazarbaevtyń «Tsıfrly Qazaqstan» memlekettik baǵdarlamasyn júzege asyrý boıynsha berilgen tapsyrmasyna sáıkes júzege asyrylyp jatyr. Memlekettik basqarýdyń tıimdiligin jáne ashyqtyǵyn arttyrý maqsatynda jumyspen qamtý, bilim berý jáne densaýlyq saqtaý sapasyn arttyrýdy kózdep otyrmyz. Tipti, onlaın baılanys arqyly mańyzdy jáne shuǵyl mindetter sheshimin tabady degen senim bar. Óńirlik BAQ arasyndaǵy forýmy kezinde Aqparat jáne kommýnıkatsııalar mınıstri Dáýren Abaev aqparattty taratýda eń jedel saıttardyń ózi messendjerler men áleýmettik jelilerge ilese almaı otyrǵanyna toqtalǵan bolatyn. Ári oblys ákimi Berdibek Saparbaev áleýmettik jelilerdegi memlekettik organdardyń paraqshalaryn kún saıyn qadaǵalap otyrady»,- dedi oblys ákiminiń baspasóz qyzmeti.
Aıta keteıik, Aqtóbe qalasy ákimdiginiń akkaýnty arqyly jergilikti turǵyndar tikeleı efır arqyly mańyzdy jınalystardy kórip júr. Sý tasqyny kezindegi jumystar da tikeleı efır arqyly tarady. Qazirgi ýaqytta Qobda, Mártók jáne Muǵaljar aýdandarynyń ákimdikteri ashqan akkaýnttardyń belsendiligi joǵary. Máselen, Mártók aýdanynyń ákimi Nurjaýǵan Qalaýovtyń aıtýynsha, jeke qabyldaýǵa jazylýshylar sany azaıyp, jeli arqyly jedel jaýap alýshylardyń qatary artty. Aýdandardyń ınstagramdaǵy paraqshasy aýdan atymen atalady. Máselen, Áıteke bı - aitekebi_akimat, Yrǵyz - irgizakimat bolyp atalǵan.
