Aqtóbelik júrgizýshiler suıytylǵan gaz quıý beketterinde kezekte tur

AQTÓBE. QazAqparat - Aqtóbe qalasynda suıytylǵan gaz tapshy. Qazir oblys ákimdigi, arnaıy qaýymdastyq pen deldaldar arasynda gaz tapshylyǵynyń sebebi anyqtalyp jatyr, dep habarlaıdy QazAqparat tilshisi.

Aqtóbe qalasyndaǵy memlekettik mekemeler túgel suıytylǵan gazben júredi. Benzınnen úsh ese arzan otyndy paıdalanatyn 36 myńnan astam kólik bar. Resmı tirkelmegenderiń sany áli belgisiz. Sonyń saldarynan usynystan suranys artyp, tapshylyq jıi seziledi.

Aqtóbe oblysy ákimdiginiń energetıka jáne turǵyn úı-kommýnaldyq sharýashylyq basqarmasynyń basshysy Dastan Amanovtyń aıtýynsha, ákimdik óńirge qajetti gazǵa ýaqytyly tapsyrys berip otyr.

«Ákimdik óz mindetin oryndap otyr. Gazǵa tapsyrys berildi, zaýytpen kelisim bar. Ári qaraı baqylaý júrgize almaımyz. Gaz taratý, bólý isi jekeniń qolynda. Ony ózderinen suraý kerek»,- dedi Dastan Amanov.

Aqtóbelikter túni boıy gaz izdedi. Kóbi talonmen ótkizedi. Sondyqtan qolma-qol aqshaǵa satatyn gaz quıý beketterinde kezek kóp.

Aqtóbede gaz quıý beketterine suıytylǵan otyndy bóletin tasymaldaýshylar qaýymdastyǵy qurylyp, jumys istep tur. Olar eki iri zaýyttan 9500 tonna gaz alýǵa kelisim jasap qoıǵan. Biraq bul jumysqa deldaldar daıyn emes bolyp shyqty.

«Aı saıyn gaz suranysy artyp keledi. Jeltoqsan aıynda 9 myń tonnany Jańajol gaz óńdeý zaýytynan, 500 tonna gazdy TShO-dan alamyz. Qazir deldaldardyń tirkeý qujaty bolmaı, Atyraýdan jetkiziletin gaz keshigip jatyr. Zaýyttan alyp, Aqtóbege jetkizetin operatorlardyń jumysy rettelmedi»,- dedi gaz tasymaldaýshylar qaýymdastyǵy tóraǵasynyń orynbasary Altynaı Muhanova.

Aıta keteıik, eki apta buryn Pavlodar gaz óńdeý zaýytynyń jóndeý jumystaryna baılanysty suıytylǵan gaz tapshylyǵy sezilgen bolatyn.

Qarashada Aqtóbe oblysyna 8200 tonna gaz bólinse, jeltoqsanda 9500-ge jetti. Biraq júrgizýshilerdiń basty problemasy túbegeıli sheshimin tappady.