Aqtóbelik júrgizýshiler múgedekterge arnalǵan kólikpen emtıhan tapsyrýǵa májbúr
AQTÓBE. QazAqparat - Aqtóbede júrgizýshi kýáligin alý úshin emtıhan tapsyratyndar synaqtan óte almaı júr. Sebebi kólik jaramsyz, dep habarlaıdy QazAqparat tilshisi.
Oblystyq memlekettik qyzmet isteri departamentiniń qyzmetkerleri qoǵamdyq uıym ókilderimen birigip Aqtóbe qalasynyń mamandandyrylǵan halyqqa qyzmet kórsetý ortalyǵyn tekserdi. Onda memlekettik qyzmet sapasyna monıtorıng júrgizildi.
«Avtodromda «V» sanaty boıynsha praktıkalyq emtıhan tapsyrý úshin múmkindigi shekteýli adamdarǵa arnalyp jabdyqtalǵan kólik quraly qoldanylatyny anyqtaldy. Ári kólik buzylyp tur. Onda pedali, qol tejegishi, avtomattandyrylǵan datchıkteri isten shyqqan, tórt dońǵalaǵy qısyq. Saýalnama kezinde júrgizýshi kýáligin alý úshin ár adam 2 600 teńge tólep, avtodromda emtıhan tapsyrýy tıis ekeni belgili boldy. Degenmen keıbiri 3 nemese 9 ret tapsyrsa da óte almaı júr. Tájirıbeli júrgizýshilerdiń ózi qınalyp, synaqqan súrindi», - dep habarlady oblystyq memlekettik qyzmet isteri departamentiniń baspasóz qyzmeti.
Aıta keteıik, departament «Azamattarǵa arnalǵan úkimet» memlekettik korporatsııasyna hat joldap, qatelikterdi joıýdy usyndy.
