Aqtóbelik jigitti uryp, sańyraý qylǵan polıtseı óz kinásin moıyndamady
AQTÓBE. QazAqparat - Aqtóbede ýchaskelik polıtsııa qyzmetkeri Aıbek Alıshevke qatysty qylmystyq is sotqa jetti. Ol Qylmystyq kodekstiń «Densaýlyqqa qasaqana aýyr zııan keltirý» baby boıynsha jaýap beredi, dep habarlaıdy QazAqparat tilshisi.
Aqtóbede 26 jastaǵy Aslan Sársenǵalıev ótken jyly dámhanada otyrǵan jerinen soqqyǵa jyǵyldy. Taksımen úıine oralǵan jas jigit esinen tanyp, birneshe kún jansaqtaý bóliminde em qabyldady. Qazir qulaǵy estimeıdi, sóıleý máneri joıylyp barady. Buǵan deıin habarlaǵanymyzdaı, tergeýshilerden kúder úzgen jábirlenýshi Aqtóbe oblystyq prokýratýrasyna aryz jazǵan bolatyn. Keıin Aqtóbe oblystyq ІІD ózindik qaýipsizdik basqarmasy istiń tergelip jatqanyn, birneshe medıtsınalyq saraptama taǵaıyndalǵanyn jetkizdi.
Búgin №2 Aqtóbe qalalyq sotynda alǵashqy sot otyrysy ótti. Sýdıa Roza Kúzembaeva jábirlenýshilerge quqyqtaryn túsindirdi. Soqqydan soń eki qulaǵy múlde estimeı qalǵan jábirlenýshi Aslan Sársenǵalıev óz quqyqtaryn kitaptan oqyp aldy.
«Jıenim Aslan Sársenǵalıevtiń eki qulaǵy estimeı qaldy. «Múgedeksiń» dep aıtsaq renjip, sóılespeı qalady. Bas-mı jaraqatyn alǵan soń em júrgizý kerek. Sońǵy ýaqytta kózi aýyryp, kórý qabileti nasharlap barady. Іstiń sotqa jetýi úshin birneshe quqyq qorǵaý organyna baryp, kezdesý ótkizýimizge týra keldi»,- dedi Botagóz Qalıeva.
Alǵashqy sot otyrysy kezinde aıyptalýshy Aıbek Alıshevtiń óz kinásin moıyndamaıtyny belgili boldy. Sot otyrysy jalǵasyp jatyr.
