Aqtóbelik jigit óz ákesin pyshaqtap óltirdi

AQTÓBE. QazAqparat – Aqtóbede ákesi men balasy janjaldasyp qaldy. Urys-keris kezinde balasy ákesine eki ret pyshaq suǵyp aldy, dep habarlaıdy QazAqparat tilshisi.

Oqıǵa keshe tańerteń boldy. Aqtóbe oblystyq PD baspasóz qyzmetiniń habarlaýynsha, Yrǵyz aýdanynyń 28 jastaǵy turǵyny ákesin pyshaqtaǵan.

«Ákesi mas kúıinde úıge kelgen. Sol kezde ekeýiniń arasynda janjal týyndady. Janjaldyń arty tóbeleske ulasyp, uly ákesine as úı pyshaǵymen eki ret soqqy jasaǵan. Qylmystyq kodekstiń «Densaýlyqqa qasaqana aýyr zııan keltirý» baby boıynsha sotqa deıingi tergeý amaldary júrgizilip jatyr. Qazirgi ýaqytta kúdikti ustaldy. Sotqa deıingi tergep-tekserý júrip jatqan soń qalǵan málimetter Qylmystyq is júrgizý kodeksiniń 201-baby 1-bóligine sáıkes jarııa etilmeıdi», - dedi oblystyq PD baspasóz qyzmeti.

Oqıǵaǵa qatysty aýdandyq densaýlyq saqtaý basqarmasy da málimet taratty.

«Oqıǵa keshe boldy. Tańerteń saǵat 8:00-de aýdannyń 1963 jylǵy turǵyny óte aýyr jaǵdaıda jetkizildi. Denesinde túıip-tesilgen jaraqat boldy. Ókpesi qatty jaralanǵan. Sonymen birge jabyq bas-mı jaraqatyn alǵan. Basynan alǵan jaraqaty kóp. Mıy shaıqalǵan. Aýrýhanaǵa es-tússiz jetkizilip, sol kúni saǵat 10:30-da kóz jumdy», - dedi Yrǵyz aýdandyq aýrýhanasynyń bas dárigeri Ernar Domaqov.