Aqtóbelik jastar jalǵyzbasty qarııalardy qamqorlyqqa aldy
Qartaıǵan shaǵynda jalǵyz turatyn qarııalar únemi kútimdi qajet etedi. Óz betimen qozǵalýy qıyn ardagerler qysta jer úı aýlasyndaǵy qardy shyǵara almaıdy. Mundaıda "Jas Otan" jastar qanaty únemi kómektesýge ázir. Aqtóbe oblysynda kómekke zárý jáne erekshe kóńil bólýdi qajet etetin 42 zeınetker bar. Jastar eńbek ardagerleri Samal Selbaeva, Zoıa Boıko jáne Anastasııa Prıhnoǵa baryp, azyq-túlik apardy, qardan aýlasyn tazartty. Samal Selbaeva 70 jasqa tolady. Ol 40 jyl medıtsına salasynda eńbek etken. Qazir úıinde jalǵyz. Úsh balasy basqa qalalarda jumys isteıdi.
«Úıim yldıda ornalasqan. Erigen qar sýy jınalmas úshin aýlanyń ishin qardan jıi tazartyp turý qajet. Bul jumysqa únemi jasotandyqtar kómek kórsetip keledi. Meni eshqashan umytpaıdy. Al Toqtar esimdi jas jigi maǵan ózimniń balamdaı bolyp ketti. Ár demalysta keledi», - dedi zeınetker.
Al Zoıa Boıko bilim salasynda 40 jyl jumys istegen. Ol qalanyń eski bóliginde jalǵyz turady. Jasotandyqtar onyń úıine de jıi barady.
«Ata-anamyz bizdi ádepti, úlkendi syılap, kishige úlgi bolýǵa tárbıelep keledi. Meniń de 70 jastan asqan ata-ájem bar. Sondyqtan qarııalarǵa kómek kórsetý týraly usynys jasaǵanda birden kelisip, dostarymyzben birge eriktiler tobyn qurdyq. Biz qamqorlyǵymyzdaǵy ata-ájelerimizge aýa raıy men jumysymyzǵa qaramastan apta saıyn baramyz. Barmaı qalý olarǵa aýyr tıedi, al bul durys emes. Aǵa býynǵa qamqorlyq jasaý - parasatty paryzymyz», - dedi «Jas Otan» jastar qanatynyń belsendisi Medet Ábenov.
