Aqtóbelik jastar týǵan ólkesin kórkeıtýge belsene atsalysyp jatyr
AQTÓBE. QazAqparat - Aqtóbe oblysynda jastardyń jumyspen qamtylýyna járdemdesý jóninde keshendi is-sharalar qolǵa alynýda.
Osy maqsatta stýdentterdiń qurylys jasaqtarynyń jáne «Jasyl el» jasaqtarynyń jumysyna jańashyldyqtar engizildi. Eger ótken jyldary jasaqtar tek jazǵy mezgilde jumys istese, endi osy jyldan bastap jastar jyl boıyna jumys isteýge jáne eńbekaqy tabýǵa múmkindik aldy, dep habarlaıdy Aqtóbe oblystyq óńirlik kommýnıkatsııalar qyzmeti.
Bıylǵy jyly eńbek jasaqtaryna barlyǵy 5 500-den astam jastar qatysady. Olardyń árqaısysymen jeke eńbek sharty jasalady. Aı saıynǵy eńbekaqysy 50-55 myń teńge. Jumystardy uıymdastyrýǵa barlyǵy 400 mıllıonǵa jýyq teńge bólingen.
Óńirde jasaqshylardyń eńbektegi jetistikteri qosymsha marapattalady. Al bıylǵy jyly eń úzdik seksen adamǵa Astanaǵa joldama syılyqqa beriletin bolady.
Qazirgi ýaqytta jasaqshylar Aqtóbe men oblystyń basqa da eldi-mekenderin kórkeıtýmen jáne kógaldandyrýmen, «Nurly jer» jáne «Týǵan jer» baǵdarlamalary aıasynda turǵyn úıler men mańyzdy áleýmettik nysandar turǵyzýmen aınalysýda.
Odan basqa, jasaqtar ekologııalyq aktsııalarǵa da belsendi qatysýda. Mysalǵa, kóktem kelgeli beri olar Elek, Qarǵaly ózenderiniń, Aqtóbe sý qoımasynyń janyndaǵy Aqtóbe turǵyndary demalatyn jerlerinen 15 tonna qoqys shyǵardy.
«Jasyl el» eńbek jasaqtaryn uıymdastyrý, olarǵa jastardy ornalastyrý jáne eńbekaqy tóleý boıynsha elimizde Aqtóbe oblysy dástúrli alǵashqy oryn alatynyn aıta ketkimiz keledi. 2017 jyly oblystyq shtab «Respýblıkalyq úzdik shtab» ataǵyna ıe boldy.
2005 jyldan 2007 jyl aralyǵynda oblystyń stýdenttik jasaqtary qatarynda 50 myńǵa jýyq jastar eńbek etti. Olar 900 myń aǵash otyrǵyzyp, 10 myń tonna qoqys jınap, olardy shyǵardy. 2520 gektar saıabaqtar men gúlzarlardy jasyldandyryp, 1200 obekti turǵyzdy.
