Aqtóbelik jastar aýǵan soǵysynyń ardagerlerimen kezdesti

AQTÓBE. QazAqparat – KSRO áskeriniń Aýǵanstan jerinen shyǵarylǵanyna 33 jyl toldy. Aqtóbede «Ómir sabaqtary» jobasy aıasynda jastar aýǵan soǵysynyń ardagerlerimen kezdesti, dep habarlaıdy QazAqparat tilshisi.

Aýǵan soǵysynyń ardagerleri búgin Aqtóbe qalasyndaǵy eskertkish mańyna jınalyp, qarýlastaryn eske aldy.

Jyl saıyn 15 aqpan kúni olar bas qosyp, elge oralmaǵan, iz-túzsiz joǵalyp ketken maıdangerlerdiń rýhyna quran baǵyshtaıdy.

Sonymen birge búgin «Ómir sabaqtary» jobasy aıasynda jastarmen kezdesti.

«Kezdesýge bozbalalardy arnaıy shaqyryp otyrmyz. Ásirese kóktemgi shaqyrýǵa iligetin jigitter keldi. Al olarmen aýǵan soǵysynyń ardageri Marat Qoılybaev pen áskerı komıssarıat qyzmetkeri kezdesti. Ýnıversıtet túlekteri ózderin qyzyqtyrǵan, ómirlik máni bar suraqtyń jaýabyn ala aldy. Taǵylymdy áńgime UOS ardagerlerimen, tyl eńbekkerlerimen de ótedi. Tárbıelik máni zor basqosý jastar úshin taptyrmas ómirlik tájirıbe boldy. Tek er balalar emes, qyzdar da áskerı qyzmette júr. Sondyqtan olar da áńgime tyńdap, suraǵyn qoıdy», - dedi Aqtóbe oblystyq jastar resýrstyq ortalyǵynyń basshysy Nurlybek Mýsın.

Otanǵa adal qyzmet etý, ultty súıý syndy taqyrypty qozǵaǵan aýǵan soǵysynyń ardageri Marat Qoılybaev jastardy patrıot bolýǵa úndedi.

«Sońǵy demim shyqqansha antqa berik bolamyn degen sózdi ustanǵan janmyn. Ol kezde 18 jasta edim. Jaspyn, biraq ózime senimdimin. Jastarmen kezdeskende jıi aıtamyn. Jigit antty bir-aq ret beredi. Ony oryndaý paryz. Biz de osy sertten taımaı, aýǵan jerinde boryshymyzdy ótedik. Tasqa jazylǵandaı tarıhta qalady bári. Aýǵan soǵysy alystaǵanymen, sol maıdannan oralǵan ardagerlerdiń júreginde jazylmaǵan jara bar. Ol túsinikti. Biz táýelsiz eldiń bolashaǵyna qamqorlyq tanytyp, tárbıe isine kóńil bólip kelemiz. Sol úshin de qarýlastaryma alǵys aıtamyn», - dedi Marat Qoılybaev.

Aıta keteıik, sol jyldary aýǵan jerine myńnan asa aqtóbelik barǵan. Urys dalasynda 26 aqtóbelik qaza tapty.