Aqtóbelik jasóspirim ash qalmas úshin 6 ret dúkenge urlyqqa túsken
Aqtóbe oblystyq prokýratýrasy ata-ananyń nazarynan tys qalyp, túrli qylmys jasaǵan jasóspirimderge qatysty derekterdi tizbektedi. Bıyl 21 jasóspirim 60 qylmystyq quqyq buzýshylyqqa bardy. Prokýrorlardyń málimetine súıensek, qylmystyq istiń 70 paıyzy qysqartylǵan. Degenmen, 32 jasóspirim aldyńǵy isinen sabaq almaı, qaıtadan zań buzdy. Teń jartysy az qamtylǵan, tolyq emes otbasynyń balalary.
«Mektep oqýshysynyń ákesi qaza bolyp, anasy jumys istemegen. Sol kezde oqýshy quqyq buzyp, tirkeýge alyndy. Komıssııa qarap, anasyn jumysqa ornalastyrdy. Eger barlyq mán-jaıdy bilip otyrǵan memlekettik organdar der kezinde kómek bergende oqýshy qylmys jasamaǵan bolar edi. Sonymen qatar, taǵy bir oqıǵa bar. Anasy balany tastap ketken, ákesi ishimdikke salynǵan. Polıtsııa qyzmetkerleri ata-ana quqyǵynan aıyrý týraly is qozǵaǵanymen, bul jumys aıaqtalmaǵan. Sol kezde 15 jastaǵy jasóspirim tiri qalý úshin dúkenderden 6 ret azyq-túlik urlady. Bilim bólimi, jergilikti atqarýshy bılik eshqandaı shara qoldanbaǵan, otbasyǵa kómek bermegen»,- dedi Aqtóbe oblystyq prokýratýrasynyń basqarma basshysy Qanat Naqymbekov.
Aıta keteıik, prokýrorlar aýyl jasóspirimderiniń de qylmysqa jıi baratynyn anyqtady. Bıyl aýylda 48 qylmys tirkeldi. Sonymen qatar, oblys ortalyǵyna oqýǵa, jumys isteýge keletin jastar da nazardan tys qalyp jatyr. Olardyń basym bóligi jaldamaly páterde turady.
«Aqtóbeniń Mártók aýdanynda 9 jasóspirim men 32 qolaısyz otbasy tirkeýge alyndy. Biraq birde bir materıal jasóspirimder isi jónindegi komıssııada qaralmaǵan. Minezi qıyn, buzyq balalardy esepke almaǵan derekter de anyqtaldy. Máselen, mektep oqýshysy kóliktiń qosalqy bólshekterin urlap alǵan. Ony komıssııa qaramady. Mundaı oqıǵa Aqtóbe qalasy, Temir, Shalqar, Qarǵaly aýdandarynda da tirkeldi. Al Mártók aýdanynda jasóspirimder isi jónindegi komıssııa 4 otyrys ótkizip, 6 otbasynyń suraqtaryn qaraǵan. Biraq bári qaǵaz júzinde jasalyp, jalǵan hattama toltyrylǵan»,- dedi Aqtóbe oblystyq prokýratýrasynyń basqarma basshysy.