Aqtóbelik jas natýralıster «Dımash» baǵyna alma kóshetterin otyrǵyzdy
AQTÓBE. QazAqparat - Aqtóbedegi jas natýralıster stansasynyń oqýshylary «Dımash» baǵyna 50 túp alma kóshetin otyrǵyzdy. Oqýshylar endi ánshi Dımash Qudaıbergenmen kezdesýdi armandaıdy, dep habarlaıdy QazAqparat tilshisi.
Aqtóbe qalasyndaǵy mektep oqýshylary men balabaqsha búldirshinderi búgin «Dımash» baǵyna alma aǵashtaryn otyrǵyzdy. Bul qalalyq jas natýralıster stansasyndaǵy balalardyń oıymen júzege asyrylǵan is.
«Qalalyq jas natýralıster stansasynyń oqýshylary jerlesimiz, qazaq atyn álemge tanytqan Dımash Qudaıbergenge qurmet kórsetý týraly sheshim qabyldady. Oqýshylar arasynda saýalnama júrgizildi. Olar «stansa aýlasynda alma baǵyn ashyp, Dımashtyń atyn bereıik» dedi. Sharaǵa mektep, balabaqsha ujym qatysty. Biz arnaıy oryn daıyndap qoıdyq. Dımash qalaǵa kelgen kezde ata-ájesimen, baýyrlarymen, ata-anasymen stansaǵa soǵyp, kóshetti óz qolymen otyrǵyzyp berse degen armanymyz bar. Biz ony kútemiz»,- dedi stansa dırektory Mánshúk Jetpisova.
Búgin «Dımash» baǵyna alma aǵashynyń birneshe túri egildi. Balalar aldymen aǵash egýdiń ádisin meńgerip, árqaısysy óz tilegin aıtty.
«Dımash aǵamyzdy kórý bizdiń armanymyz. Ol Aqtóbege kelgen kezde stansaǵa soǵyp, bizben kezdesý ótkizse degen tilegimdi aıtyp, alma kóshetin ektim. Men de bolashaqta qazaq atyn álemge tanytqym keledi. Qazir barlyq bala Dımashqa elikteıdi. Onyń óneri álemdi tánti etti. Biz ony maqtan tutamyz»,- dedi mektep oqýshysy Dılnaz Orazǵazına.
Jas natýralıster stansasy 1953 jyly qurylǵan. Janýarlar, ósimdikter, ekologııa baǵyty boıynsha jumys isteıdi. Úıirme sabaqtary osy úsh baǵyt boıynsha júrgiziledi. Barlyǵy 630 oqýshy qosymsha bilim alady. Sabaqtyń kóbi orta mektepterdi bazasynda ótedi. Al tájirıbe kezinde balalar stansaǵa barady.
«Stansadaǵy tiri buryshta janýarlar bar. Jaralanǵan eki dala qyrany ákelindi. Et,balyq jeıdi. Qolǵa úıretilgenine 5-6 jyl boldy. Olardy qazir jibersek, dalada mertigip qalýy múmkin. Sonymen qatar, qoıandar, taýyq pen átesh bar. Taýys qusy taıaýda Almatydan ákelindi. Totyqus, teńiz shoshqasy men eshki baǵylady. Qurlyq, teńiz tasbaqalary da jınaldy. Kóbin qala turǵandary baǵa almaı, tapsyrady, syılaıdy. Balalar bos ýaqytynda baqylap, qalaı tamaqtanatynyn, áreketin qarap, kúndelik júrgizedi. Zertteý jumystaryn, ǵylymı maqalalar jazady»,- dedi stansa dırektorynyń orynbasary Gúlmıra Ábiqaeva.
