Aqtóbelik jas mamandar baspanaly boldy
AQTÓBE. QazAqparat - Aqtóbede jas otbasylarǵa páter berildi. Kópqabatty turǵyn úı «Jumyspen qamtýdyń 2020 jol kartasy» baǵdarlamasy boıynsha salyndy, dep habarlaıdy QazAqparat tilshisi.
Qazaqstan halyqtarynyń birligi kúni Aqtóbede 115 páterli kópqabatty turǵyn úı paıdalanýǵa berildi. Páter kiltin mádenıet, sport, bilim, densaýlyq saqtaý salasynda jumys isteıtin, zaýytta eńbek etetin jastar aldy.
«Buǵan deıin biz 90 páterli turǵyn úıdiń kiltin tabys ettik. Al búgin 115 páterli turǵyn úıde qonys toıy ótip jatyr. Qazaqstan halyqtarynyń birligi kúnimen qatar kelgen qos qýanysh qutty bolsyn! Jas mamandar úshin páter máselesi eń ózekti ekenin bilemiz. Bárin bir mezette sheshý múmkin emes. Degenmen bul baǵyttaǵy jumys úzdiksiz júredi», - dedi oblys ákimi Berdibek Saparbaev.
Jas mamandarǵa berilgen kópqabatty turǵyn úı «Jumyspen qamtýdyń 2020 jol kartasy» baǵdarlamasy boıynsha salyndy. Baǵdarlama boıynsha qurylys jumystaryna 570 mıllıon teńge jumsaldy. Sonymen qatar, Aqtóbede «Nurly jer» baǵdarlamasy boıynsha 400 páterli eki qabatty úı salynyp jatyr. Bıyl 10 myń adamǵa jer telimi beriledi.
«Biz jas otbasymyz. Búgin qyzmettik páterge qol jetkizip, qýanyshqa kenelip jatyrmyz. Jastarǵa qoldaý kórsetken Elbasy Nursultan Nazarbaevqa, oblys ákimdigine rızashylyǵymyzdy bildiremiz. Biz elimizdiń bolashaǵy úshin eńbek etetin bolamyz», - dedi Ásel Álibıqyzy. 
