Aqtóbelik zeınetker bir ǵasyr buryn salynǵan úıinen kóshe almaı otyr

Aqtóbe qalasyndaǵy Janqoja batyr kóshesiniń turǵyny Aısulý Jurmaǵambetova 30 jyldan beri turatyn úıinde qorqynyshpen ómir súrip jatyr. Sebebi úıi apatty jaǵdaıda tur.

«Ózim Aqtóbe oblysy, Qobda aýdanynda turdym. Muǵalim bolyp jumys istep, zeınetke shyqtym. Keıin Aqtóbe qalasyna kóship kelip, aýla sypyrýshy qyzmetin atqardym. Memleket bergen úıge 30 jyl boldy. Qabyrǵasy sógildi, tóbesinen sý ketedi. Qyzdarym turmysqa shyqty. Olardyń da jaǵdaıy nashar. Ulym ajyrasyp ketken, ózimniń janymda turady. Otbasyn zeınetaqymmen asyrap otyrmyn. Toıyp tamaq ishpeımiz, úıimiz salqyn»,- dedi Aısulý Jurmaǵambetova.

Aqtóbe qalasynda gaz bolǵanymen, bul úı áli peshke aǵash jaǵyp otyr. Úıden ystyń ıisi shyǵady. 80 jastan asqan qarııa kúnine bir márte tamaq iship, jan baǵyp otyr. Bar suraıtyny - baspana. 

«Úıim apatty dep tanylyp, kezek kútip otyrmyn. 5 jyldan beri kútip, kómek suraımyn. Biraq ákimdik kómektese almaıtynyn jetkizdi. Túnde qorqyp uıyqtap, tańerteń oıanǵanymyzǵa shúkir etemiz»,- dedi qarııa.

Aıta keteıik, Aqtóbede 22 kópqabatty turǵyn úı apatty jaǵdaıda tur. Qazirgi kezde jergilikti bılik apatty turǵyn úılerdi memlekettik-jekeshelik seriktestik aıasynda qaıta salýdy josparlap otyr.

«Biz apatty kópqabatty úıdi joıý jumystaryn júrgizemiz. Jyl ótken saıyn úılerdiń jaǵdaıy nasharlap barady. Jumysty tıimdi júrgizý maqsatynda, kezekte turǵan adamdar sanyn azaıtýǵa memlekettik-jekeshelik seriktestik baǵdarlamasyn qoldanamyz. Aqtóbe qalasynda qurylys kompanııasy turǵyndarmen kezdestip, 8 adammen kelisimge keldi. Kóktemde qurylys júrgiziledi. Dál osy ádispen basqa úılerge de baramyz. Eger kópqabatty turǵyn úıde bir adam ruqsat bermese, ekijaqty kelisim bolmaıdy. Al eger qala ishindegi úıdiń aýmaǵy tar bolsa, biz qurylys kompanııasyna basqa aýmaqtan jer beremiz. Al aýmaǵy shaǵyn úıdi bızneske paıdalanýǵa bolady»,- dedi Aqtóbe qalalyq turǵyn úı ınspektsııasynyń meńgerýshisi Haıdar Ermashev.