Aqtóbelik zeınetker áje júrdek poıyzdyń mıllıonynshy jolaýshysy atandy (FOTO)

ASTANA. QazAqparat - 2016 jylǵy mıllıonynshy jolaýshyǵa «Tulpar-Talgo» poıyzdarynda tegin júrý múmkindigin beretin sertıfıkat tabys etildi, dep habarlaıdy «Jolaýshylar tasymaly» AQ-nyń baspasóz qyzmeti.

Búgin Astana vokzalynda «Tulpar-Talgo» júrdek poıyzynyń 2016 jylǵy mıllıonynshy jolaýshysyn saltanatty túrde qarsy aldy. Aqtóbe qalasynan úsh nemeresimen elordaǵa saparlap kelgen zeınetker Qanymaı Bekbaýova mıllıonynshy jolaýshy atandy.

Oǵan jyl aıaǵyna deıin «Tulpar-Talgo» júrdek poıyzdarynda elimizdiń kez kelgen baǵytyna (10 márte) tegin júrýge múmkindik beretin sertıfıkat tabys etildi.

«Jalpy jyl basynan beri otandyq poıyzdar 10 mıllıon adam tasymaldady. Onyń ishinde «Tulpar-Talgo» poıyzdaryn paıdalanǵa n adamdardyń sany kúrt ósip 1 mıllıonnan asty. Bul 2015 jylmen salystyrǵanda 2,1 ese artyq. Máselen, byltyr jyl boıy júrdek poıyzdar 1 mln astam jolaýshy tasysa, atalǵan kórsetkish bıyl bar-joǵy alty aıda oryndalyp otyr», delingen habarlamada.

Qazir «Tulpar-Talgo» poıyzdarynda kóp balaly analarǵa, soǵys ardagerlerine, múmkindigi shekteýli jandarǵa, stýdent jastarǵa jáne t.b. jeńildik beretin dıskonttyq kartalar bar. Demek júrdek poıyzdar ártúrli áleýmettik toptar úshin qoljetimdi bolyp otyr.

Búginde elimizde júrdek poıyzdar 12 baǵytta qatynaıdy, al 2020 jylǵa deıin taǵy da 8 baǵyt qosylady dep josparlanýda. Bıyl keń kýzovty jańa vagondardan turatyn jańa poıyzdar «Astana-Almaty» jáne «Almaty-Shymkent» baǵyttary boıynsha jolǵa shyǵady. Bul atalǵan baǵyttar boıynsha kúnine eki márte «Tulpar-Talgo» poıyzdary júredi degen sóz.

Jyl aıaǵyna deıin«Tulpar-Talgo» júrdek poıyzdarymen 2 mln astam jolaýshylar tasymaldaý kózdelip otyr.