Aqtóbelik zeınetker aýyldastaryna maskany tegin tigip berdi
Muǵaljar aýdany, Taldysaı aýylynyń turǵyndary Jamıǵa Samıgýlınany jaqsy tanıdy. 40 jylǵa jýyq ýaqyt boıy aýyldaǵy mektepte eńbek páninen sabaq bergen zeınetker qazir úıinde tapsyrys qabyldaıdy. Týǵan-týystaryna qyz jasaýyn da daıyndap bergen. Al indet órshigen shaqta aýyldastaryna maskany tegin tigip berdi.
«Mektep bitirgen soń naǵashym Aqtóbe qalasyndaǵy tigin fabırıkasyna jumysqa ornalastyrdy. Sol kásiporynda úsh jyl boıy eńbek ettim. Keıin otbasylyq jaǵdaıǵa baılanysty aýylǵa oralyp, Muǵaljar aýdany, Taldysaı orta mektebinde eńbek páninen sabaq berdim. 40 jylǵa jýyq ýaqyt jumys istep, zeınetkerlikke shyqtym. Sodan beri úıdemin. Qolymnan is keletinin biletin aýyl turǵyndary, týystarym tapsyrys beredi. Іndet órshigen kezde volonter bolyp kettim. Balabaqsha meńgerýshisi mata ákeldi, olarǵa tegin tigip berdim. Aýyl turǵyndary da ótinish aıtty. Eshkimdi keri qaıtarǵan emespin. Barlyǵy 200-den astam maska tigildi», - dedi zeınetker volonter.
Jamıǵa Samıgýlına úshin aldyndaǵy tigin mashınasy anasynyń kózindeı. Shań basyp jatqan jerinen úıine ákelip, kádege jaratyp otyr. Jarty ǵasyrdan assa da esh mini joq.
«Eńbek adamdy órge jeteleıdi. Úıde balalardyń tamaǵyn daıyndap, mal qaraýǵa shyǵamyn. Keshkilik bári úıge jınalady, teledıdar qosylady. Sol kezde de bos otyrmaımyn. Bos otyrý tekke ketken ómir sekildi kórinedi. )azir ózimniń nemerelerim tigýdi úıretýdi suraıdy. Olardy da eńbekke baýlyp júrmin», - dedi ol.
