Aqtóbelik volonterler múgedek bala baǵyp otyrǵan otbasylarǵa azyq-túlik jetkizip jatyr

AQTÓBE. QazAqparat – Aqtóbede balasy týa bitti dertke shaldyqqan, ata-ana qamqorlyǵynsyz qalǵan, az qamtylǵan otbasylarǵa eriktiler kómektesip jatyr. Olarǵa azyq-túlik pen gıgıenalyq zattar jetkizildi, dep habarlaıdy QazAqparat tilshisi.

Aqtóbe oblysyndaǵy qoǵam belsendileri, eriktiler men aýǵan soǵysynyń ardagerleri birigip, kásipkerler qoldaýymen úı-úıdi aralaýǵa kóshti. Arnaıy sebette qajetti azyq-túlik pen gıgıenalyq quraldar, medıtsınalyq betperde bar.

«Elbasy Nursultan Nazarbaevtyń bastamasymen «Nur Otan» partııasy150 mln teńge bólip, partııanyń ortalyq apparaty men fılıaldarynyń qyzmetkerleri qosymsha ózderiniń bir kúndik jalaqysyn aýdarady. Osy qaıyrymdylyq aktsııasynyń aýqymy keńeıip, elimizdiń barlyq aımaqtarynda óte bastady. Partııanyń oblystyq fılıaly tóraǵasy, oblys ákimi Ońdasyn Orazalınniń tapsyrmasymen partııa fılıaldary, belsendi partııa músheleri, jasotandyqtar, eriktiler, jalpy belsendi aqtóbelikter kómek kórsetýge jumyldy. Nátıjesinde múmkindigi shekteýli bala tárbıelep otyrǵan 23 otbasyna kómek kórsetildi. Bul jalǵasa beredi», - deıdi «Jas Otan» jastar qanatynyń oblystyq fılıal tóraǵasy Asyljan Búrkitalın.

Eriktiler koronavırýstan qorǵaný aqparattyq paraqshasyn da taratty. Al aqtóbelikter qıyn kezde kómekke kelgen jastarǵa alǵys aıtty.

«Bul bizdiń birigip, birge amal etip, kómektesetin shaǵymyz. Az qamtylǵan, muqtaj otbasylardyń áleýmettik jaǵdaıy úshin alańdap, olarǵa kómektesý paryzymyz. «Jumyla kótergen júk jeńil». Biz osy uranmen járdemdesýdi bastadyq, jastardyń kómegimen jalǵastyra beremiz», - dedi «Er Baqyt» patrıottyq klýbynyń tóraǵasy Marat Qoılybaev.