Aqtóbelik veterınarlar brýtsellez dertine shaldyqqan maldy túgel tapsyrýdy surady
Aqtóbe oblysynyń Oıyl aýdanynda brýtsellez derti anyqtalyp, karantın jarııalanǵany týraly habarlaǵan bolatynbyz. Jergilikti mal dárigerler iri qaradan qan synamasyn alyp, Qaratal men Kemer aýylyndaǵy maldy arnaıy mal soıý beketterine ótkizýge usynys berdi. Qazirgi kezde árbir 15 kún saıyn qan synamasy alynyp, tekserýge alynyp jatyr. Sozylmady aýrý kez kelgen jolmen juǵatyn bolǵan soń mal ıeleri birden soıýǵa kelisim berýi kerek.
«Veterınarlyq-sanıtarlyq saraptamadan soń mal ıelerine ótemeaqy beriledi. Ótemeaqynyń 30 paıyzyn memleketten, al 70 paıyzyn et óńdeý kombınatynan esepteledi. Bıyl bul maqsatqa 87 mıllıon teńgege jýyq qarjy bólindi. Qazirgi kezde qansha adamnyń ótemeaqy alǵanynyn aıta almaımyz. Mal soıý jumystary endi bastalyp jatyr. Mal ıesi qujattaryn rettep, tapsyrsa ǵana aqsha alady. Bıyl ettiń bir kelisi 1380 teńge boldy»,- dedi Aqtóbe oblystyq veterınarııa basqarmasynyń basshysy Keńes Kanadbaev.
Veterınarlardyń aıtýynsha, aýrý oshaǵy kezekti qan synamasyn alý kezinde anyqtalǵan. Ótken jyly 500 myńnan astam bas mal tekserildi. Bıyl 47 myńnan astam maldan qan synamasy alynyp, 303 bas maldan aýrý anyqtaldy. Brýtsellez aýrýyna shaldyqqan mal basy ár aýdanda bar.
«Brýtsellezge shaldyqqan maldyń ishki qurylysynda ózgerister bolsa, onda et óńdeýge jiberiledi. Etin jeýge bolady. Bárin saraptama anyqtaıdy»,- dedi Keńes Kanadbaev.
Oıyl aýdanynyń ákimi Bulbul Kúzembaeva aýrý anyqtalǵan soń turǵyndarmen bes ret kezdeskenin aıtyp berdi. Aýyl turǵyndary mal aýyrmaý úshin ne isteýge bolatynyn suraǵan.
«Veterınarlyq shekteýdi paıdalanyp, aýyldaǵy aýrý maldy joıý kerek. Mal dárigerler zań aıasynda halyqqa qyzmet kórsetip jatyr. Ákim men mal dárigeri túsindirý jumystaryn júrgizdi. Olar jumyssyz otyr dep aıta almaımyz. Eger soıylǵan maldyń ishki qurylysy ózgermese, ıesine qaıtaryp berýge bolady»,- dedi aýdan ákimi Bulbul Kúzembaeva.
Aýrýdyń aldyn alý úshin malǵa ekpe jasaýǵa bolady. Biraq aýrý anyqtalǵan oshaqta vaktsına jasaýǵa tyıym salǵanǵan.
«Mal ıesi aýmaqtyq veterınarııa ınspektsııasyna habarlasyp, ekpe jasata alady. Ol úshin óz qarjysyn jumsaıdy. Buryn memleket esebinen vaktsınatsııa jasaldy. Kedendik odaqqa engen soń vaktsınatsııa jasalǵan mal eksporttalmaıtyn boldy. Sondyqtan ózgertýler men tolyqtyrýlar engizildi»,- dedi QR AShM Veterınarlyq baqylaý jáne qadaǵalaý komıteti, Aqtóbe oblystyq ınspektsııasynyń bólim basshysy Aısaǵalı Aıjaryqov.
