Aqtóbelik ushqyshtar halyq shyǵarmashylyǵy festıvalinde kósh bastady
AQTÓBE. Sáýirdiń 5-i. QazAqparat /Samal Endibaeva/- Aqtóbede áskerı qurylymdar men qarýly kúshter ujymdarynyń arasynda «Jeńis jasasyn!» degen atpen halyq shyǵarmashylyǵynyń qalalyq festıvali ótti. Uly Jeńistiń 65 jyldyǵyna arnalǵan bul festıvalde ushqyshtar - T.Bıgeldınov atyndaǵy Áýe qorǵanysy kúshteri áskerı ınstıtýtynyń ujymy ozyp, birinshi oryndy jeńip aldy.
Qalalyq ákimdiktiń baspasóz qyzmetinen habarlaǵandaı, sharaǵa 8 ujym, atap aıtqanda: 6655 jáne 30238 áskerı bólimderi, T.Bıgeldınov atyndaǵy Áýe qorǵanysy kúshteri áskerı ınstıtýty, Tótenshe jaǵdaılar jónindegi departament, Aqtóbe zań kolledji, Aqtóbe oblysynyń mamandandyrylǵan kúzet qyzmeti basqarmasy, Eset batyr atyndaǵy polıtsııa mektep-ınternaty, Aqtóbe oblysynyń qorǵanys isteri jónindegi departamenti atsalysty.
Festıval-konkýrstyń sharty boıynsha ujymdar 15-20 mınýttyq taqyryptyq kópjanrly baǵdarlama usyndy. Ekinshi oryndy - Aqtóbe oblysynyń mamandandyrylǵan kúzet qyzmeti basqarmasynyń ujymy, al úshinshi oryndy - Tótenshe jaǵdaılar jónindegi departamentiniń ujymy jeńip aldy. Al yntalandyrý syılyǵy 6655 áskerı bólimge buıyrdy.
