Aqtóbelik turǵyn qaraýsyz qalǵan kópirge qala ákiminiń esimin berýdi surady
AQTÓBE. QazAqparat - Aqtóbe qalasyndaǵy Sazdy saıajaı aýmaǵynda qaraýsyz qalǵan kópir bar. Saıajaıdaǵy kooperatıv tóraǵasy Dúnıe Álıev kópirdi qala ákimi Іlııas Ispanovtyń atymen ataýdy surady, dep habarlaıdy QazAqparat tilshisi.
Aqtóbe qalasyndaǵy Sazdy saıajaı aımaǵynda keshe qar sýy kóp jınalyp, halyq keshkilik úılerine jete almaı qalǵan bolatyn. Búgin turǵyndardy ábigerge salǵan aýmaqty Aqtóbe qalasynyń ákimi Іlııas Ispanov pen jumys toby arnaıy qarap shyqty.
«31 naýryz kúni bir aılyq mólsherde qar túsip, keshe kún kúrt jylyp ketti. Ótken jyly biz sýaǵarlarǵa qubyr salyp, qalpyna keltirgen bolatynbyz. Biraq sý aǵyny qatty kelip, qubyrlar sýdy ýaqytyly ótkize almady. Sýdan qutqarý shtaby jyralardy keńeıtip, dıametri 2 metr bolatyn beton qubyr saldy. Úılerdi sý basqan joq, aldyn-alý jumysy ýaqytyly júrgizildi. Degenmen Sazdy saıajaıyndaǵy qar sýy ótetin tabıǵı jyralar qaıta qalpyna keltirip, sý ótetin qosymsha jol salynýy qajet»,- dedi qala ákimi Іlııas Ispanov.
Saıajaı aýmaǵy qazir turǵyn úı massıvine aınalyp ketken. Munda eki qabatty kottedjder, ásem úıler salynǵan. Jumys toby qurylys kezinde tabıǵı arna buzylyp, sý aǵar joldar jabylyp qalǵanyn rastady.
«Qazirgi sý aǵyp jatqan arnany betondap, qalpyna keltirgenimizben, bul jaǵdaı jylda qaıtalana beretin bolady. Sondyqtan ekinshi arnany iske qosýymyz kerek»,- dedi oblystyq tótenshe jaǵdaılar departamentiniń basshysy B.Syzdyqov. Oqıǵa ornyna kelgen oblys ákiminiń orynbasary Jańabaı Beksarynyń aıtýynsha, Sazdy sý qoımasyna quıatyn arnany qalpyna keltirý kezinde saıajaıdaǵy keıbir úıler súriletin bolady. Sol kezde ǵana jyl saıyn qaıtalanatyn kóktemgi sý tasqynynan saqtanýǵa bolady.
Aıta keteıik, Sazdy saıajaı aýmaǵyndaǵy kooperatıv tóraǵasy Dúnıe Álıev qaraýsyz qalǵan kópirdi qala ákimi Іlııas Ispanovtyń atymen ataýdy usyndy. Bul kópirdiń qurylysy ázirge beımálim kúıinde qalyp otyr.
«Sazdy sý qoımasynda sý az. Sondyqtan quny 2,7 mıllıard teńge bolatyn sý burý jobasy jasaldy. Osylaısha, biz jazda Sazdyǵa qajetti sýdy Aqtóbe sý qoımasynan alǵymyz keledi. Kópir qurylysyn sol jobaǵa qosyp, salýǵa bolady»,- dedi Іlııas Ispanov.
Eske salsaq, keshe túnde Aqtóbe qalasyndaǵy mal bazarǵa barar jolda sý tasyp, turǵyndar úılerine jete almaı qaldy .
