Aqtóbelik turǵyn eki jyldan beri saıajaıda shynydan úı salyp jatyr
AQTÓBE. QazAqparat - Aqtóbelik turǵyn eki jyldan beri shynydan turǵyn úımen japsarlas ornalasqan garaj salyp jatyr. Eni men uzyndyǵy 6 metr bolatyn qurylysqa qansha shyny ketkeni belgisiz, dep habarlaıdy QazAqparat tilshisi.
Aqtóbedegi saıajaılardyń birinde shynydan garaj ben oǵan japsarlas ornalasqan úı salynyp jatyr. Saıajaı ıesi ózi týraly aqparatty jarııalaýǵa qarsy bolǵanymen, mán-jaıdy qurylys jumystaryn júrgizgen Volodııa Erýtın aıtyp berdi.
«Qurylys jumystarynyń bastalǵanyna eki jyl ýaqyt boldy. Bul jerde shyny qosymsha qurylys materıaly qyzmetin atqarady. Úı qabyrǵasyn negizi tsement berik ustap tur. Shynymen jumys isteý qıyn. Úsh qap shynyny túske deıin qalaýǵa bolady. Qabyrǵanyń qısyq bolyp ketpeýin qadaǵalaý, tsementpen bekitý ońaı sharýa emes. Bir qapta kem degende 60 shyny bar»,- dedi qurylysshy Volodııa Erýtın.
Qurylys jumystary kezinde bos bótelke suryptalmaǵan, tańdalmaǵan. Qurylysqa bári jaramdy, shydamdy.
«Garaj ben úı japsarlas ornalasqan. Bir bólmeli úı bolady. Qabyrǵadaǵy kók tústi shyny sol kúıi qalady, al ózgesi balshyqpen jabylyp, tegisteledi. Qasbeti de tsementtelip, ákteledi. Sol kezde úıdiń bos shynydan jasalǵany baıqalmaıdy. Mundaı jumystardy ózim kórgenim joq. Ózge óńirlerde bar dep estigen edim. Qurylys jumystary kezinde bótelkeni sanamadym. Máselen, bir qabyrǵaǵa 3-4 myń dana bótelke ketýi múmkin»,- dedi Volodııa Erýtın.
Aıta keteıik, qazirgi kezde úı ıesi qurylys jumystaryn aıaqtaýǵa qajetti bos bótelkeni jınap jatyr.
