Aqtóbelik turǵyn 1840 jylǵa deıin ýaqytsha esepke alyndy
AQTÓBE. QazAqparat - Aqtóbe qalasynyń turǵyny Irına Shmıdt búgin áleýmettik járdemaqy alý úshin qujat tapsyryp, mekenjaı anyqtamasyn shyǵaryp aldy. Qujatta Shmıdtter otbasy 1840 jylǵa deıin ýaqytsha tirkeýge alynǵan, dep habarlaıdy QazAqparat tilshisi.
Irına Shmıdt birer kún buryn Halyqqa qyzmet kórsetý ortalyǵyna baryp, kámelet jasqa tolmaǵan balalary úshin áleýmettik kómek alýǵa ótinish jazady. Sol kezde mekenjaı anyqtamasy shyǵarylyp, qate belgili boldy.
«Men ortalyqtaǵy mamanǵa qujattarymdy berip, kútip otyrǵan kezde mekenjaı anyqtamasyn shyǵaryp berdi. Qujat boıynsha 2017 jyldyń 30 qańtarynan 1840 jyldyń 31 qańtaryna deıin ýaqytsha esepke alynǵanmyn. Osy qatelikten soń men áleýmettik kómekke qujat tapsyra almadym. Endi ekinshi toqsannyń aqshasyn ala almaımyn. Maǵan aıyppul tólep, qaıta tirkeýge turyńyz dep aıtty. Meniń ǵana emes, úsh balamnyń da qujattarynda 1840 jyl dep jazýly tur»,- dedi Irına Shmıdt.
Qujatty halyqqa qyzmet kórsetý ortalyǵyndaǵy oblystyq ІІD, Kóshi-qon polıtsııasynyń mamandary qarap shyqty. Inspektor Gúlmıra Býrınanyń aıtýynsha, Іshki ister departamentiniń bazasynda eshqandaı da qate joq eken.
«Irına Shmıdt tirkeýde turǵan úıdiń ıesi ony 2017 jyldyń 30 qańtarynda tizimnen shyǵaryp jibergen. Úı ıesi aldyn-ala habarlap, Shmıdtter otbasyna aıtýy kerek edi. Biraq zań boıynsha úı ıesi habar bersin degen mindet joq. Arada eki aı ótti. Qazirgi ýaqytta Irına Shmıdt esh jerde turaqty, ýaqytsha tirkeýde joq. Ol ózi turǵan mekenjaı boıynsha ýchaskelik ınspektorǵa baryp, ákimshilik hattama alýy kerek. Sol boıynsha 15 883 teńge aıyppul tóleıdi»,- dedi G.Býrına.
Mamandardyń aıtýynsha, turaqty jáne ýaqytsha tirkeýde joq adamdarda dál mundaı sandyq qatelik kezigip turady eken.
