Aqtóbelik tergeýshiler jalǵan jer aktilerin jasaǵandardy taba almady
AQTÓBE. QazAqparat - Aqtóbelik polıtsııa qyzmetkerleri jalǵan jer aktilerin jasap, qarapaıym adamdardy aldap ketkenderdi taba almady. Qylmystyq is qysqartyldy, dep habarlaıdy QazAqparat tilshisi.
Aqtóbe qalasyndaǵy jer qatynastary bóliminiń basshysy Ushqyn Myńbaev sybaılas jemqorlyqqa qarsy kúres komıssııasynyń otyrysynda sheshilmeı júrgen kóp máseleni ortaǵa saldy. Birinshiden, bólimde maman tapshy ári qatelik kóp. Ekinshiden, oblys ortalyǵynda jalǵan qujat daıyndap, 10 sotyq jer ala almaı júrgenderdi aldaǵandar tabylmady.
«2016 jyldan kúni búginge deıin fýnktsıonaldy mindetterin tıisti deńgeıde atqarmaǵany úshin bólim qyzmetkerlerine ártúrli sıpattaǵy tártiptik jaza qoldanyldy. Atap aıtar bolsaq, 2016 jyly 9 eskertý, 7 sógis berildi. 2017 jyly eki eskertý berildi. 2016 jyly jalǵan qujat jasaýdyń 10 deregi tirkeldi. Belgisiz bireýler azamattarǵa zańsyz jer aktilerin berilgen. Qylmystyq kodekstiń «Alaıaqtyq» deregi boıynsha tıisti sharalar qabyldaý úshin is qujattary ishki ister bólimine tapsyryldy. Tergeý júrgizilip, quqyq buzýshylardyń anyqtalmaýyna baılanysty is qysqartyldy»,- dedi bólim basshysy U. Myńbaev. Azamattarǵa jalǵan jer aktilerin berý deregi boıynsha bıyl 7 oqıǵa tirkeldi. Ushqyn Myńbaevtyń aıtýynsha, bıyl 2006 jyly kezekke turǵan 10 myń aqtóbelikke jer beriledi degen jospar bar. Alaıaqtar bul sátti de ońtaıly paıdalanýy múmkin.
«Bıyl anyqtalǵan qylmystyq derekter boıynsha qujattar ishki ister basqarmasyna, sybaılas jemqorlyqqa qarsy kúres bólimderine joldandy. Tergeý jumystary júrgizilip jatyr. Kezdesýge kelgen azamattarǵa eskertý berip otyramyz. Sebebi, aldaǵy ýaqytta jer beriledi. Adamdar alaıaqtarǵa aldanyp qalýy múmkin»,- dedi bólim basshysy.
Aıta keteıik, bıyl Aqtóbede «Nurly jer» baǵdarlamasy boıynsha turǵyn úı salynyp jatyr. 10 sotyq jerge salynǵan daıyn baspana kezekte turǵan azamattarǵa beriledi.
