Aqtóbelik telefon úshin tanysyn atyp óltirgen
AQTÓBE. QazAqparat - Aqtóbe oblysy Hromtaý aýdanynyń turǵyny Marat Amanov qońyraý shalýǵa telefonyn bermegen tanysyn atyp tastady. Qazir zańsyz qarý saqtap, adam óltirgeni úshin aıyptalyp jatyr, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda 40 jastaǵy Hromtaý aýdanynyń turǵyny Marat Amanovqa qatysty qylmystyq is qaralyp jatyr. Oǵan Qylmystyq kodekstiń «Adam óltirý», «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baptary boıynsha aıyp taǵyldy.
Іs materıalyna súıensek, osy jyldyń qańtar aıynda aıyptalýshy Marat Amanov pen jábirlenýshi Rýmıantsev bir dastarqanda otyryp, ishimdik ishedi. Sol kúni aıyptalýshy óziniń tanysy Rýmıantsevten qońyraý shalý úshin telefonyn suraıdy. Sol jerde janjal shyǵyp, Rýmıantsev aıyptalýshy M.Amanovty soqqyǵa jyǵady. Keıin aıyptalýshy Marat Amanov 16 kalıbrli tapanshany saqtap, ózine yńǵaıly ýaqytty kútken. Tergeý kezinde qarýdy qaıdan alǵany anyqtalǵan joq. Sol qarýdy alyp, Rýmıantsevtiń úıine baryp, oq atqan. Oq jábirlenýshiniń oń jaq keýde tusyna tıip, ol aýrýhanada kóz jumdy. Keıin aıyptalýshy oqıǵa ornynan qashyp ketip, qarýdy garaj mańyna tyǵyp tastaıdy.
Aıta keteıik, sot otyrysy kezinde aıyptalýshy Marat Amanov óz kinásin moıyndamady. Sotqa jábirlenýshi tarap qatysqan joq.
