Aqtóbelik tasymaldaýshylar jolaqyny 200 teńgege kóterýdi surady
AQTÓBE. QazAqparat - Aqtóbelik tasymaldaýshylar 55 teńgelik jolaqyny birden 200-212 teńgege kóterýdi surap otyr. Alǵashqy qoǵamdyq tyńdaýǵa saýsaqpen sanarlyqtaı turǵyn jınaldy, dep habarlaıdy QazAqparat tilshisi.
Aqtóbe qalasyndaǵy «Avtopark» JShS-i men memleket qarjylandyryp otyrǵan Qalalyq jolaýshylar tasymaly kásiporny jańa avtobýstar satyp alyp, keıin jolaqyny kóterýdi surady. Alǵashqy qoǵamdyq tyńdaý «Geolog» mádenıet úıinde ótti. Jıynǵa 10-ǵa jýyq turǵyn kelip, ózderiniń qarsylyqtaryn bildirdi. Al tasymaldaýshylar baǵany kóterýdiń sebebin túsindirdi.
«Avtopark» JShS-i» 212 teńgege, Qalalyq jolaýshylar tasymaly kásiporny 200 teńgege jolaqyny kóterýdi surady. Aqtóbe qalasynda jolaqy 2015 jyldan beri 55 teńge bolyp saqtalyp otyr»,- dedi Aqtóbe qalalyq jolaýshylar kóligi jáne avtomobıl joldary bólimi basshysynyń orynbasary Baýyrjan Aldııarov.
Qazirgi kezde Qalalyq jolaýshylar tasymaly kásipornynda 129 avtobýs bar. 2010-2017 jyldary shyǵarylǵan avtobýstardy aınalymǵa engizgen kásiporynnyń qaryzy 360 mıllıon teńgege jetken.
«Kásiporynda 300-den astam adam jumys isteıdi. Onyń 190-y júrgizýshi. Kompanııada júrgizýshilerge suranys bar. Jalaqy az bolǵan soń kóbi ketip qalady. Jańa avtobýstar alynǵan, aı saıyn lızıngke 16 mıllıon teńgeden astam aqsha tóleý qajet. Suıytylǵan gaz, dızel baǵasy ósip tur. Sondyqtan shyǵyn eselenip tur»,- dedi Qalalyq jolaýshylar tasymaly kásipornynyń dırektory Rústem Erǵalıev. Al «Avtopark» JSSh-i 34 baǵyt boıynsha qyzmet kórsetip otyr.
«Apta saıyn, aı saıyn qosalqy bólshekter qymbattap jatyr. Janar-jaǵarmaı sharyqtap barady. Biz jolaqyny 212 teńgege kóterýdi surap otyrmyz. Sońǵy eki jylda 85 avtobýs alynyp, 1,7 mıllıard teńge jumsaldy»,- dedi kompanııa dırektory AqarysTileýles.
Al qoǵamdyq tyńdaýǵa kelgen turǵyndar birden qarsylyqtaryn bildirdi.
«Zeınetkerler, stýdentter men balalarǵa jeńildik bolǵany durys. Biz negizi jolaqynyń qymbattaýyna qarsymyz. Sebebi, bizdiń aýylǵa keletin №29 baǵyttaǵy avtobýstyń háli múshkil. Oryndyqtary jyrtylǵan, jazda ystyq, qysta salqyn. Stýdentterdiń qalaı júretinin bilmeımin. Olar eńbekaqy almaıdy, jumys istegen adam da 200 teńgeni taýyp berýge qınalady»,- dedi turǵyn Sıdıakına.
Aıta keteıik, qoǵamdyq tyńdaý qalanyń birneshe aýmaǵynda ótedi. Depýtattar men qoǵamdyq uıym ókilderinen qurylǵan top turǵyndardyń aryzy men ótinishin tyńdaıdy.
