Aqtóbelik súńgýirler joǵalǵan balany sý astynan izdeı almaı otyr
AQTÓBE. QazAqparat - Aqtóbede 13 aqpan kúni joǵalyp ketken bala Elek ózeninen izdestirilip jatyr. Ózen aǵysynyń jyldamdyǵy artyp, súńgýirler sý astyna túse alar emes, dep habarlaıdy QazAqparat tilshisi.
Aqtóbede 13 sáýir kúni keshkilik 10 jastaǵy Birjan Ersaıynov joǵalyp ketken bolatyn. Buǵan deıin habarlaǵanymyzdaı, mektep oqýshysy oınaımyn dep úıinen shyǵyp ketkennen qaıtyp oralmaǵan . Polıtsııaǵa habar keshkilik túsip, oblystyq tótenshe jaǵdaılar qyzmeti shuǵyl izdeý jumystaryn bastady.
«Tótenshe jaǵdaılar qyzmeti balalardyń aıtýy boıynsha bir-birin qýalap júrgen kezde ol sýǵa túsip ketken degen boljammen izdeýdi bastady. Taǵy bireýi balanyń seń ústinde sekirip júrgenin, keıin batyp ketkenin aıtty. Eki jaǵdaıdy eskerip, izdeý qar sýynan jınalǵan alańda júrgizildi. Bul qar sýy Jińishke ózenine, Jińishke Elek ózenine quıady», - dedi TJD shuǵyl qutqarý jasaǵynyń kezekshilik-dıspetcherlik qyzmetiniń jetekshisi Oksana Kıchıgına.
Іzdeý jumystary áli jalǵasyp jatyr. Jergilikti ákimdik, turǵyndar men polıtsııa qyzmetkerleri, týǵan-týystary men tótenshe jaǵdaılar qyzmeti ózen men jaǵalaýdy qarap jatyr. Biraq súńgýirler ózen astyna túse alar emes.
«Qazirgi ýaqytta sý laı jáne ózen aǵyny qatty. Talap boıynsha ózen sýy adam kózi kórmeıtindeı laı bolsa, sýdyń aǵys jyldamdaǵy sekýndyna 2 metrden assa, súńgýirlerdiń ómirine qaýip tóndiredi. Sondyqtan olar sý astyna túse almaıdy. Dál osyndaı jaǵdaı 5-6 jyl buryn boldy. Ol kezde eresek adam sýǵa ketti. Áli kúnge deıin onyń múrdesi tabylmady. Durys túsinińizder, qoldan kelgenniń bári jasalyp jatyr», - dedi oblystyq tótenshe jaǵdaılar departamentiniń basshysy Baýyrjan Syzdyqov.
Tótenshe jaǵdaılar qyzmeti qazirgi ýaqytta Aqtóbe qalasy irgesindegi aýyl mańynda izdeýdi jalǵastyrdy. Sebebi, Elek ózeniniń aǵysy sol jerlerde saıabyrsyp, birneshe arnaǵa bólinedi eken.
«Úsh kún jan-jaqty izdeý jumysy júrgiziledi. Ózenge matorly qaıyqtar shyǵaryldy. Taǵy jeti kún ózen jaǵasyn qaraımyz. Keıin izdeý toqtatylady», - dedi B.Syzdyqov.
Aıta keteıik, 10 jastaǵy Birjan Ersaıynovtyń týǵan-týystary izdeý jumystaryn qala ishinde de júrgizip jatyr. Olar bala adasyp, saıajaılardyń birinde boı tasalaýy múmkin dep boljap otyr. Sebebi, keıbir adamdar balany kórgenin aıtty. Ersaıynovtar otbasy jappaı izdeý sharasyn uıymdastyryp, qala turǵyndarynan kómek surady.
