Aqtóbelik stýdentter qoǵamdyq kólikte analarǵa án arnap, gúl syılady
AQTÓBE. QazAqparat -Aqtóbelik stýdentter búgin qoǵamdyq kólikke minip, analarǵa án arnady. Aldyn ala daıyndalǵan jastar názik jandylarǵa gúl syılady, dep habarlaıdy QazAqparat tilshisi.
Aqtóbe qalasynda bilim alyp júrgen jastar búgin qoǵamdyq kólik ishin ánge bóledi. Halyqaralyq áıelder kúnine arnaıy daıyndalǵan stýdentter men eriktiler №1, 15, 27 baǵyttarymen júretin avtobýstarǵa minip, «Anaǵa sálem», «Mama», «Anama» atty ánderdi oryndady. 
«Jastar aqtóbelik qyz-kelinshekterge, analarymyzǵa mereke syılaý úshin arnaıy daıyndaldy. Biz bir mezetti úsh baǵyt boıynsha júretin qoǵamdyq kólikke minip, án shyrqadyq. Búgin analarymyz óz meıirimin bildirip, alǵystaryn aıtyp jatty. Shynyn aıtqanda, kishkene ǵana syılyqqa shyn qýanatyn anamyz ǵana. Olar aman bolsa, aldymyzda jadyrap júrse, álem kúlgendeı. Sondyqtan bala ana úshin, onyń qýanysh kórý úshin baryn jasaıdy. Biz de olarǵa jaqsy áser qaldyrý úshin qolymyzdan keler isti uıymdastyrdyq», - dedi Aqtóbe oblystyq ishki saıasat basqarmasy, jastar resýrstyq ortalyǵynyń mamany Nursultan Dosekeshov. 
Aıta keteıik, búgin jastar júzden astam gúl taratyp, analardyń alǵysyn aldy. Avtobýs ishinde, aıaldamada syı alǵan aqtóbelikter óz rızashylyqtaryn bildirdi. 
