Aqtóbelik stýdent álem juldyzdarynyń portretin qaryndashpen qaǵazǵa túsiredi
AQTÓBE. QazAqparat - Aqtóbelik stýdent Aııa Spambetova jarty jylda ondaǵan álem juldyzynyń portretin qaǵazǵa túsirdi. Onyń týyndylary arasynda ánshi Dımash Qudaıbergen, sportshylar Gennadıı Golovkın men marqum Denıs Ten de bar, dep habarlaıdy QazAqparat tilshisi.
Aııa Spambetovany anasy kóziniń qarashyǵyndaı aıalaıdy. Bala kezinde qurby-qudastarymen teń oınap, júgirip júrgen sátinde dertke shaldyǵyp, tósekke tańylǵan. Sodan beri emdeý-saýyqtyrý jumystary jan-jaqty júrgizildi. Baýyr eti balasy úshin bar ǵumyryn arnap, ony qatarynan ozyq etip ósirip otyrǵan ana búgingi jetistigine shyn qýanady. Sebebi Aııa Spambetova mektepti úzdik aıaqtap, «Altyn belgi» aldy.
«Qyzym 8 jasynan sýret sala bastady. Aqtóbedegi Metallýrgter mádenıet úıine 4-synypta baryp, sýret salý úıirmesine qatysty. Keıin 2013 jyldan bastap qalalyq oqýshylar saraıyndaǵy balalar shyǵarmashylyq akademııasyna tústi. Onda da 5 jyl oqyp, kýrsty aıaqtady. Respýblıkalyq, halyqaralyq sheberlik sabaqtaryna qatysyp, kásibı biliktiligin shyńdady. Qazir Qudaıbergen Jubanov atyndaǵy Aqtóbe óńirlik ýnıversıtetinde grafık-dızaıner mamandyǵy boıynsha bilim alyp júr. Bul onyń óz qalaýy», - dedi anasy.
Joǵary oqý ornyn tańdamas buryn Aııa men onyń anasy Sandýǵash zertteý júrgizdi, yńǵaılysyna toqtaldy. Sebebi Aııa toqsan saıyn em alyp, saýyqtyrý sharasyn júrgizedi.
«Qyzym - meniń depozıtim. Bar ýaqytym men kúsh-jigerimdi osy qyzymnyń bolashaǵyna arnaǵan adammyn. Adamdar Aııanyń arbada otyrǵanyn kórip músirkep, aıaǵanyn qalamaımyn. Ol da qurby-qurdastarymen teń dárejede sabaqqa keledi, bilim alady. Aııanyń qolynan is keletinin, onyń óz shyńy, jetistigi bar ekenin, eshkimnen kem emes, keıde alda júretinin kórýi tıis. Bul jolda biz aıanbaı ter tógip júrmiz. Qazir bári qyzymmen teń sóılesedi», - dedi S.Spambetova.
Aııa mýzyka tyńdaǵandy da unatady. Dımash Qudaıbergenniń ánderin jáne Qpop pen Kpop tyńdaıdy. Ári ol «Aqtóbe» hokkeı komandasynyń jankúıeri. Stýdent shaǵyndaǵy alǵashqy kórmesi kópshilikti tańǵaldyrdy, tamsandyrdy. Sebebi ol 7-8 aıdyń ishinde alpystan astam adamnyń beınesin aınytpaı qaryndashpen qaǵazǵa túsirdi. Olardyń arasynda ustazdary men dárigerleri, qamqorshylary jáne janashyrlary bar. Ol óz týyndysyn satpaıdy, kóbine syıǵa tartý etedi. Aııa negizi sýretshi emes, sánger bolýdy armandaǵan eken. Qazir óz oıyn basqa arnaǵa buryp, dızaın salasyn tańdady.
Ýnıversıtette «Úzdik stýdent» medalin aldy. Sonymen qatar memlekettik granttan ózge, joǵary oqý orny janynan beriletin shákirtaqyǵa ıe boldy.
«Qpop pen Kpop jáne Dımash Qudaıbergendi tyńdaımyn. Hokkeı qaraımyn. Portretti de sol toptardyń ánin tyńdaǵan soń, Aqtóbeniń hokkeı komandasyna jankúıeri bolǵanda sala bastadym. Belgili bir ýaqytty naqtylap, sýret salý kerek degen oı joq. Degenmen, janymda únemi qaǵaz ben qaryndash bolady. Aǵylshyn tili men káris tilin jetik meńgergim keledi. Ýnıversıtetti aıaqtaǵan soń mamandyǵymnyń sheberi bolýdy armandaımyn. Bári de «meniń sýretimdi salyp bershi» dep ótinish aıtady. Sáti túskenin salyp beremin. Bárin fotodan qarap, qaǵazǵa túsiremin», - dedi Aııa Spambetova.
«Ózim «28 ilmek» klýbynyń eriktiler qataryndamyn. Máselen, Aııany sabaqqa ákelemin, ózim shala týǵan balalarǵa arnap kıim men kórpeshe toqımyn. Aqtóbede arnaıy klýb bar, ózimiz apta saıyn jınalyp, toqýmen aınalysamyz», - dedi anasy.
Aınaladaǵylar jas talantqa úlken qurmetpen qaraıdy. Máselen, «Aqtóbe» hokkeı komandasy Aııa 18 jasqa tolǵanda erekshe syı jasap, ony muz aıdynyna shyǵardy.
Óner adamdary da Aııanyń talaby men kásibı sheberligin baǵalap, únemi jyly lebizderin bildirip otyrady. Munyń bári stýdentke jiger berip, armandarǵa jeteleıdi.
