Aqtóbelik sottalǵandar Probatsııa úıine kómek surap barady
AQTÓBE. QazAqparat - Aqtóbede sottalǵandarǵa áleýmettik, psıhologııalyq, quqyqtyń, medıtsınalyq kómek beretin Probatsııa úıi jumys isteı bastady. Sottalǵandar jumysqa ornalasý kezinde kóp kedergige tap bolady, dep habarlaıdy QazAqparat tilshisi.
Aqtóbe qalalyq probatsııa qyzmetiniń esebinde 1200 adam tirkeýde tur. Urlyq jasap, jol-kólik oqıǵasy kezinde júrginshiniń ólimine sebep bolǵandar men alaıaqtyǵy úshin sottalǵandar aldymen psıhologııalyq test tapsyryp, bos jumys oryndarymen tanysady. Probatsııa úıi kúnine 40-50 adamǵa kómek kórsete alady. Buryn merziminen buryn bosap shyqqandar qaıda baryp, kimnen kómek suraryn bilmese, endi bir úıdiń ishinde barlyq mamannan keńes ala alady.
«Jumys júrip jatyr. Qazirgi kúni qalalyq jumyspen qamtý jáne áleýmettik baǵdarlamalar bólimine 100-den astam adam jiberildi. Olardyń 9-y kásibı daıarlyq kýrstarynda bilim alady, al úsheýi jumysqa ornalasty. Probatsııa úıinde halyqqa qyzmet kórsetý ortalyǵynyń mamany da bar. Sonymen qatar, 130-dan astam adam medıtsınalyq tekserýden ótip, dárigerlerden keńes aldy. Psıhologııalyq kómek te osy jerde beriledi»,- dedi Probatsııa úıiniń aǵa ınspektory Gaýhar Kúzenbaeva.
Degenmen, sottalýshylar áli de jumysqa ornalasý basty qıyndyq ekenin jasyrmaıdy. «Mas kúıinde qylmys jasalǵan soń men nashaqorlar tizimine iliktim. Jaza merzimi tolyq ótelgen soń nashaqorlar tiziminen alynady nemese qaldyrylady degen másele qaralady. Al qazir iri kásiporyndar meni jumysqa almaıdy. Al shaǵyn kásipkerler jalaqysy az jumys usynady ári jalaqyny ýaqtyly tólemeıdi. Kelisimshart joq, resmı jumysqa almaıdy. «Qaıda jumys isteısiń» dep surasa qujat júzinde eshteńe dáleldeı almaımyn. Jumyspen qamtý ortalyǵyna ár apta saıyn baramyn»,- dedi jazasyn óteýshi Igor Şııan.
Probatsııa úıinde psıhologııalyq kómek beriledi. «Aq Suńqar» psıhodıagnostıkalyq keshenindegi suraqtar sottalýshylar jıi kezigetin máselelerge oraı uıymdastyrylǵan. Munda keıbiri 80-nen astam suraqqa jaýap berse, endi bireýi 300 test suraǵynan ótedi. Sottalǵandardyń kóbi aldymen jumysqa ornalasyp, tabys tabýdy oılasa, keıin ata-ana men týǵan-týystyń kózqarasymen kúres jolyn izdeıdi. «Túrmeden shyqqandardy qoǵam ǵana emes, óz týystary qabyldaı almaıdy. Sondyqtan psıhologtyń kómegine júginip, ishki syrymyzdy aıtamyz. Adamdarmen ashylyp sóılesýge uıalsaq, maman bizdi biledi, túsinedi»,- deıdi jazasyn óteýshi Aıgúl Ádiljanova
