Aqtóbelik soǵys ardagerlerine 300 myń teńgeden beriledi
AQTÓBE. QazAqparat - Aqtóbede Jeńis kúnine oraı soǵys ardagerleri men tyl ardagerlerine, olardyń jesirlerine 180 mıllıon teńgeden astam qarjy bólindi, dep habarlaıdy QazAqparat tilshisi.
Aqtóbede Jeńis kúnine oraı ardagerlerge bir jolǵy tólem aýdarylyp, saýyqtyrýǵa da aqsha beriledi.
Aqtóbe oblysy ákiminiń baspasóz qyzmetiniń habarlaýynsha, Aqtóbe qalasynda turatyn ekinshi dúnıejúzilik soǵystyń 55 qatysýshysyna 300 myń teńge, Alǵa, Mártók, Muǵaljar jáne Hromtaý aýdandarynda turatyn segiz soǵys ardagerine 100 myńnan 200 myń teńgege deıin kómek aqsha beriledi.
«Uly Otan soǵysynyń qatysýshylary men múgedekterine jáne olarǵa teńestirilgen adamdarǵa beriletin jeńildikter boıynsha 50 myńnan 60 myń teńgege deıin, áskerı qyzmetkerlerdiń jesirlerine jáne tyl eńbekkerlerine 12 myńnan 15 myń teńgege deıin qarjy aýdarylady. Qazirgi kezde Aqtóbe oblysynda Uly Otan soǵysynyń 63 qatysýshysy men múgedegi bar. Barlyǵy 7574 adam soǵys ardagerlerine teńestirilgen. Olardyń 6258-i tyl eńbekkeri»,- delingen baspasóz habarlamasynda.
Aıta keteıik, oblysta barlyǵy 6300 adam dári-dármekti jeńildikpen alady. Al 4 myńnan astam adamǵa kommýnaldyq qyzmet tólemderine jeńildik berilgen. Jyl saıyn 1 mamyrdan 31 mamyrǵa deıin Qazaqstan Respýblıkasynyń jolaýshylar jáne qala mańy poıyzdaryndaǵ TMD elderi aýmaǵynda UOS qatysýshylary men múgedekteri úshin tegin bılet beriledi. Jospar boıynsha bıyl 1342 ardagerge 4,9 mıllıon teńgege qaıyrymdylyq kómek kórsetiledi.
