Aqtóbelik SQO-da ózi jumys istep júrgen úıdi tonap, qolǵa tústi
PETROPAVL. QazAqparat – Soltústik Qazaqstan oblysynda úı sharýasyna kómektesýge jaldanǵan er adam úı ıelerin tonap, qolǵa tústi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Qyzyljar aýdanynyń polıtsııa bólimine qala mańyndaǵy Penkovo aýylynyń turǵyny aryzdandy. Aıtýynsha, onyń úıinen jalpy somasy 330 myń teńge bolatyn zergerlik buıymdar men aqsha urlanǵan.
Krımınaldyq polıtsııa bóliminiń qyzmetkerleri jedel-izdestirý is-sharalaryn júrgizip, nátıjesinde birer saǵattan soń urlyq jasaǵan kúdiktini Petropavlda ustady. Aqtóbe oblysynyń 33 jastaǵy týmasy buryn da urlyq jasaǵany úshin birneshe ret sotty bolǵan eken.
«Ol bul úıge 1,5 aı buryn kelip, úı sharýasyn atqarýǵa jaldanǵan. Úı ıeleriniń jol júrip ketkenin bilgen ol úıge enip, urlyq jasaǵan. Oljalaǵan aqsha men zergerlik buıymdardy alyp, Petropavlda óz keregine jumsaǵan», - deıdi tártip saqshylary.
Bul derek «Urlyq» baby boıynsha Sotqa deıingi tergep-tekserýdiń biryńǵaı tizilimine engizilip, tergeý júrgizilip jatyr. Kúdikti eshqaıda ketpeý týraly qolhatpen bosatyldy.
«Úıge myqty qulyp salý qajettiligin aýyldyqtardyń esterine salamyz. Jolǵa shyǵarda esikterdi, terezelerdi de jaýyp, kórshilerden kóz qyryn salyp otyrýdy suraǵan jón. Urlyq jasalǵan jaǵdaıda birden polıtsııaǵa habarlaý qajet», - deıdi Qyzyljar aýdany polıtsııa bóliminiń bastyǵy Álıhan Baıqadamov.
